O le faaiuga o le vaiaso na faia ai le tufaga faailoga a le World Dance Industry Awards i Los Angeles i Amerika na mau tulaga ai i le lisi o tagata siva ta‘uta‘ua i le lalolagi le tamaitai talavou Samoa o Parris Goebel 22 tausaga le matua mai Manurewa, lea na manumalo i le faailoga faapitoa o le tamaitai faiaoga siva o le tausaga ‘Female Choreographer of the Year’.
O se tulaga maualuga le ausia ai o lea faamanuiaga pe a faatusa atu i tagata sisiva lauiloa na tausinio i lea faailoga mai atunuu eseese o le lalolagi, lea e toaono sa faia i ai le filifiliga, peitai lea ua pale ai le alo o Samoa.
O lenei tamaitai talavou e pei ona silafia, e lē gata o se tamaitai siva, o se faiaoga siva faaonapo nei, o le pule o le ‘The Palace Dance Studio’ i Penrose ma Hamiltone, o ia foi e faatautaia ausiva e lima, e aofia ai le Royal Family, Request, Bubblegum, Misfits ma le Sorority i Niu Sila nei, lea ua faasoa atu lona tomai i tupulaga lalovaoa ma le faamoemoe, e lē gata ina siva i totonu o Niu Sila ae ia maua ni konekarake e faafaigaluega ai i totonu o atunuu i fafo auā se lumanai manuia pe afai ua lē gafatia le itu tau i le aoga.
Na amata ona siva Goebel mai lava i le faatoa 4 o ona tausaga, faasolo mai lava i le 10 o tausaga na faaulu ai e si ona tina i se aoga siva, seia oo i lona 15, ae maua lona avanoa e siva ai i se tasi o ausiva.
Peitai na ia lē talia le avanoa ona o le fia mulimulita’i i lana moemitiga e faatūina sana lava ausiva, lea na amata fausia mai ai le ausiva na o tamaitai le ReQuest, tatala ai lava ma lana Dance Studio i le faatoa 17 o ona tausaga lea ua faaigoaina The Palace Studio, e pei ona ta‘ua e le tamaitai siva, ‘o le fesoasoani tele a si ona tamā i le amataina o lenei faamoemoe ma le faatupeina, o ona mātua, o le lagolagosua malosi lea i le atinaeina o lana taleni, lea ua manuia ai’.
Sa mamao ma manatu o nisi e ono iai se lumanai mo le fanau i le itu tau i faafiafiaga ma siva. E pei ona masani ai, e unai le fanau aoga i le faaloia, faafomai, faiaoga ma nisi galuega, ona o le manatu e totogi tetele.
Peitai ua iai suiga i le talutalu fou lenei i le a‘ea‘e mai o musika ma le taleni siva faaonapo nei, o se tasi lea o galuega totogi tele ua mafuli i ai le toatele o le tupulaga e faaaogā tatau i ai le taleni.
E tele ni tauvaga siva faavaomalo na auai ai Goebel ma ana ausiva e tauva ai, e aofia ai le World Hip Hop Dance Championships lea ua faatolu tausaga sosoo o manumalo ai i Amerika, siamupini i le Body Rock Dance Competition i San Diego, ma le tele o isi tauvaga siva na mau tulaga ai i Ausetalia ma Niu Sila nei.
O le tausaga 2012 na aami mai ai Goebel e faiaogaina le tamaitai pese lauiloa i Amerika Jennifer Lopez e a‘o le siva i lana faafiafiaga e malaga taamilo ai i le lalolagi mo lana Dance Again World Tour.
O lea ‘ofa, na maua ai ma le avanoa e sisiva ai Goebel ma lana ausiva faatasi ma J-Lo i le American Idol ma le ata pese na pueina ua faaigoaina o le ‘Goin In’. O lea taumafaiga, ua lē gata ina felelea‘i ai le tamaitai siva i atunuu eseese o le lalolagi, ae ua maua ai ma galuega siva a nisi o lana ausiva i atunuu i fafo, e pei ona saini ai konekarate a nisi o tamaitai siva o le ReQuest se toaono i le faafiafiaga tele i totonu o Amerika, ua faaigoaina Cirque du Soleil’s Michael Jackson, sa galue ai foi Goebel o se faiaoga siva i le tapenaga o lea show.
O lea foi la ua mae‘a le pueina o se tasi o le ata siva ta‘uta‘ua i totonu o Amerika, le Step Up 5 o loo sau ai le tamaitai talavou i lea ata tifaga, lea e faamoemoe o le a faaalia mo le taimi muamua i le aso 25 o Iulai i le ogatotonu o le tausaga nei.
