Ua molia le sui Palemia ma se tasi o minisita lagolago i solitulafono tau taavale afi ma soligatulafono i lalo o le tulafono faaleoleo, ma o loo tetee uma i laua ma ua faatali le suesueina o molimau e le faamasinoga.
O lea foi la ua faailoa e le sui sooupu o le matagaluega o leoleo le faia o se suesuega faalotoifale a le matagaluega faasaga i le alii leoleo o Maanaima Patu, i le liki poo le mama i tua o le lipoti a leoleo e faasino i le latou gaioiga na faatino lea ua molia ai le sui Palemia le tofa Fonotoe Nuafesili Pierre Lauofo ma le minisita lagolago le afioga Muagututagata Peter Ah Him.
Ua faaalia e le tofa Fauono Talalelei Tapu le sooupu o le matagaluega o leoleo ma le aufaasalalau, o le autu lea o le suesuega o loo faia ae e oo mai lava i le taimi nei e lei maua se taunuuga. O le vaega o suesuega i tulaga aloaia ma amioga a leoleo, le Police Professional Standards Unit o loo faia foi le suesuega i le faaseā a le minisita lagolago o Muagututagata faasaga i se isi tiute o le alii leoleo o Maanaima na taofi ai lana taavale e lata i le faaiuga o le tausaga na tea nei.
O loo tuua‘ia ai e le minisita lagolago le pitotasi o le faia o lea tiute o le alii leoleo, lea foi na tuu atu ai le masini manava ia te ia, ae e lei fufuluina le vaega e tuu i le fofoga o le tagata.
O le suesuega foi lenei ua poloaiina ai se tamaitai tusitala e faia sana faamatalaga i leoleo pe faapefea ona ia maua le lipoti e faasino i le tiute o leoleo i se taimi o Oketopa o le tausaga ua mavae, lea na taofi ai le taavale a Muagututagata, ae sosoo ma le oo atu i ai o le taavale a le sui Palemia e pei ona tuua‘ia ai i le taumafai e faalavelave i le tiute o leoleo.
