Manumalo le Lupe o le So‘aga taamilosaga soka a alii

Na iloa lelei lava i le pisapisao o le afiafi o le Aso Toonai i le tapuaiga a le afioaga o Magiagi ua manuia taumafaiga a ana tamafanau i le taamilosaga o le Soka i le sailiga siamupini lea na faaiu i Tuanaimato i le malae Soka o Joseph Blatter.
E lua lelei ‘au a Magiagi na oo i le sailiga siamupini o le ipu o lenei tausaga – o le ‘au a alii ma le ‘au a tamaitai ma o le taimi muamua lea i le tala faasolopito o au taaalo a alii ma tamaitai i le Soka ua ausia ai e nei ‘au se faaiuga o le taamilosaga tele lenei a le atunuu.
E tasi lava foi le kalapu na o latou fetaui mo le sailiga siamupini o le Aso Toonai, o le ‘au a tamaitai a le kalapu a le Kiwi, ua tuufaatasia ai le ‘au tupulaga talavou a le afioaga o Apia, Malifa ma Tufuiopa ma lana ‘au a alii.
Ua tele tausaga o i le tulaga muamua lenei kalapu i le malosi o ana ‘au o loo tausinio i le taamilosaga lenei a kalapu i totonu o Samoa ae o lea la ua fetaui ma le kalapu lea o le Lupe o le So‘aga mai i Magiagi.
O le faaiuga o le taaloga a tamaitai na manumalo ai teine o le Kiwi i le la taaloga ma le Lupe o le So‘aga i ‘ai e 2 Kiwi i le 1 a tamaitai o le Lupe. O le taaloga i le va o alii na manumalo ai le ‘au a Magiagi o le Lupe o le So‘aga i le ‘au a alii o le Kiwi ma o se taaloga mataina na faapea ona molimauina ai le eseese o le tulaga ua iai le tomai o fanau ma le tupulaga talavou ua iai nei i lea foi faagatama.
O le taamilosaga lenei a kalapu soka i totonu o Samoa na amata mai ia Setema o le tausaga na tea nei ma le faamoemoe ina ia faamae‘a i le masina o Mati peitai o le afā o Eveni na tele galuega na toe faia ina ia mautinoa o le malae tele o le soka i Tuanaimato e foi le tulaga lelei sa iai mo taaloga faitaulia nei. O lea la na tolopo ai le taamilosaga i le faaiuga o le vaiaso na tea nei. E lē o malolo ai le tele o polokalame o le soka e pei ona iai le taamilosaga a ‘au a ofisa, o le polokalame ua unai ai le atinae o le tomai i fanau aoga lea e faia lava i Tuanaimato i vaiaso taitasi, aemaise o isi taamilosaga e amata i le faaiuga o le vaiaso lenei ua lagolagoina e nisi o kamupani e lua i totonu o Samoa.
O lea la ua iai nei le faamoemoe o le a malolo le taamilosaga tele lenei a kalapu ae toe amata ia Aukuso o le tausaga lava lenei ma faagasolo atu ai foi i le tausaga fou.
E 12 lelei kalapu na tausinio i le taamilosaga lenei i totonu lava o Samoa ae o le masina fou lea ua fuafua le asosi soka a Samoa e agai ai i Savaii ona o le ipu lea o loo tausinio ai le taamilosaga tele lea a le atunuu (National League) o loo tele lava i ‘au a le motu o Upolu o loo tauva ai ae o le masina fou la lea ua tuu i ai le amataga o le taamilosaga o le soka mo kalapu i totonu o le motu tele i Salafai.
Mo tama o le Lupe o le So‘aga, o le manumalo muamua lenei ua mafai ona maua e le ‘au a le afioaga i lenei foi taaloga, ma o le taumafaiga ma le faamoemoe ina ia unai le taaloga o le soka ma ia tumau le faamaopoopo o itupa e lua i alii ma tamaitai i le taamilosaga lenei o kalapu i totonu o le atunuu.
O sauniga lotu o le faafetai na faatautaia i le Aso Sa auā le sami ai o lenei foi taumafaiga a tupulaga o le afioaga.