Faaaogā aiga i atunuu i fafo faamaonia nonogatupe a aiga i Samoa

O se tala fiafia lea mo nai o tatou aiga i Samoa, ona ua iai le fuafuaga a le Matagaluega o Fale a le atunuu, le Housing Corporation, e talia tagata o aiga o loo aumau i atunuu mamao e pei o Niu Sila ma Ausetalia, e avea ma nisi e faamaonia (guarantors) ni nonogatupe a nai o latou aiga i Samoa, aemaise i latou o loo iai tonu i vaipanoa na sili ona mafatia i aafiaga o le Afā o Eveni e pei ona afatia ai le atunuu i le faaiuga o le tausaga talu ai.
O lenei fuafuaga na faamaonia talu ai nei mai le Kapeneta, ma e iai le talitonuga e pei ona saunoa le pule o le vaega tau tulafono a le Housing, Alosio Leota, o lenei fuafuaga e mautinoa o le a faaleleia ai le tulaga o le faiga o nonogatupe a nai tagata o le atunuu, ma ua faigofie ai i nai aiga i Samoa ona vave toe faaleleia o latou fale na faaleagaina, e ala i le faia o ni nonogatupe mai le Housing Corp, ae fesoasoani atu fanau ma aiga i atunuu mamao i le toe totogiina o nei nonogatupe.
I lenei la fuafuaga fou, ua mafai ai e se tasi o le fanau poo le fanau uma o loo alala i atunuu i fafo, ona saini faatasi ma se tasi o matua poo mātua uma e toalua o loo i Samoa, ina ia faamaonia le nonogatupe ua fai.
Lona uiga, afai ae alu alu faaletonu le totogiina o le nonogatupe, ona saisaitia ai lea o mātua i le aitalafu. Saunoa la Leota, o le ala lena o le fai o lea faiga, auā e leai lava se Samoa e manao e faalogo atu ua saisaitia o latou mātua ma ave e loka i le falepuipui ona ua lē totogia le loan. Ona vave ai lea ona toe faamaoni e totogi le nonogatupe ina ia lē faaletonu ai mātua.
Aemaise foi, o le faia faapea, o le a mautinoa ai e fanau o loo galulue fita mai atunuu i fafo, o le a alu sa‘o le faaaogāina o tupe o loo lafo i aiga i Samoa, auā ua alu sa‘o e faalelei ai fale nai lo le alu e faatau ai taavale, ma alu i mea faalelotu ma isi mau mea o loo faaalu vale i ai seleni o loo lafo i aiga, ae o le mea sili lea ona tāua ia lelei, le fale e nonofo ai mātua ma le aiga. E tusa ma le $5 miliona lea ua faamaonia e le Kapeneta e faatulaga mo le toe faia o fale o nai aiga na faaletonu i le afā, e tauala mai lea i le faalapotopotoga o Fale a le malo, le Housing Corp. O le mea moni lea sa avea ma ponaia i nai isi aiga i Samoa i le mananao e fia fai ni nonogatupe mai le Housing e fai ai fale, peitai e leai nisi o aiga o lelei ni galuega totogi, ma maua se totogi faifaipea, o i latou na e mafai ona faaaogā e faamaonia ni nonogatupe.
Peitai o le suiga ua faamaonia mai nei e le Kapeneta, ua matuā talisapaia ma le fiafia e nai aiga o loo manaomia ona toe faaleleia pe fausia nisi fale talu mai aafiaga o le Afā o Eveni.