Ua lē faaauauina ona suesue le tagi ose su ale tamaitai loia le susuga Unasa Iuni Sapolu, faasaga ile tamaitai Faamasino ole faamasinoga faaitumalo le afioga Talasa Atoa Saaga. Ose tagi sa tuua’ia ai e Unasa le faamasino i lona soli o nisi o aiaiga ole Tulafono Faavae e faasino i tiute tauave ose faamasino ole faamasinoga.
Sa tuua’ia foi le faamasino ile pito tasi o lana silasila ile itu a leoleo ma latou molimau na folasia ile faamasinoga. Ole tausaga ua mavae ile masina o Me na aumai ai se faaiuga ale faamasinoga faaitumalo na faamaonia ai le moliaga ole lafo ose upu taufaifai e Unasa Iuni Sapolu. Ose moliaga a leoleo na tuuina atu ile faamasinoga ona ose feeseesea’iga ile va ole tamaitai loia ma se tasi o ona uso tuofe.
Sa tetee Unasa ile moliaga ae ina ua mae’a ona suesue molimau i luma ole afioga ile faamasino o Talasa Atoa Saaga, na aumai le faaiuga ua faamaonia le solitulafono ole faia ose lafoga taufaifai (uttering insulting words). Ole faaiuga ale afioga Talasa na faapafala ai se faasalaga e aunoa ma le faamaonia ose moliaga poo le discharge without conviction.
Peitai na faaulu le su a Unasa Iuni Sapolu ona o vaega o taualumaga o lona faamasinoga e pei ona ta’ua atu ile amataga o lenei lipoti. Ole afioga ile tamaitai faamasino ole Faamasinoga Maualuga, Mata Keli Tuatagaloa, na suesueina le talosaga ale Loia Sili sa tulai mo le faamasinoga ina ia taofi le faaauauina ole su poo le strike out motion. Sa finau le Loia Sili i lea talosaga e faapea sa lelei ma sagatonu atoatoa le faatinoina o tiute ole faamasino e tusa o tulafono oloo faatonutonu ma lima ta’ita’iina ai lana galuega.
Sa finau foi le Loia Sili e iai le aiaiga tau tulafono faavaomalo oloo agavaa iai ma Samoa e aveesea ai se moliaga tau tuua’iga o solitulafono e aafia ai se faamasino poo le Immunity Law. Ole vaega lea ole finauga ale Loia Sili sa tetee malosi iai Unasa Iuni Sapolu ma lana itu ona o lana mau o aiaiga o tulafono e lē agavaa ai Faamasino ole Faamasinoga Faaitumalo i aiaiga o lea tulafono ae na’o faamasino ole Faamasinoga Maualuga.
Peitai na talia e le afioga Mata Tuatagaloa le finauga ale Loia Sili e aofia uma faamasino tusa lava poo le ā le faamasinoga i lea tulafono faavaomalo. E sefulu afe le aofaiga atoa ose tupe na su ai e le itu tagi le tamaitai faamasino o Talasa. Peitai ole talia ole talosaga ale Loia Sili e taofi le faaauauina ole mataupu, ua muta ai ma le finauga ale itu tagi.
E lē o mafai ona mautinoa pe o iai se fuafuaga a Unasa e nate toe apili le faaiuga ale Faamasinoga Maualuga ile Faamasinoga o Talosaga toe iloilo poo le Court of Appeal
