“Ole a faaigoa le a’oga lea ole HOT SOUP.” E fai lava le tala a Siliniu Lina Chang ma ‘ata. “E mo’i lava la’u tala ole igoa lena ole aoga mo tamaiti oloo faatau afitusi ile taulaga, ae lē o toe aooga, ma tamaiti ua mumusu e aooga ona ua lē toe mafaia mataupu ole a’oga, ma tamaiti ua mumusu e aooga, ona ua lē mafai lava e matua ona faatupe a latou a’oga.” E aooga ai tamaiti 18 tausaga le matutua ma lalo ifo.
Ole faaletonu lenei, ua faitau fia sefulu tausaga talu ona aafia ai fanau a Samoa lima vaivai, ma fanau a mātua na tuliesea mai o latou nuu, ini faasalaga ole ati ma le lau, ae o fanau ua leai se fiafia e alu ile aoga. O fanau tonu lava na lea ua aapa nei iai le HOT SOUP ale Toomaga mo ē Puapuagatia e faa’oa i tomai faapitoa e saili ai o latou lumanai.
Na talanoa ai Siliniu, ole aoga lea e lē toe a’oa’oina ai ni mataupu pei ona faia i totonu o potu a’oga, sa mumusu mai ai tamaiti nei. Ole a a’o le latou ta piano. Ole a a’o le eleiina o lavalava, ole tuiga ole teu, ole gaosiga o oloa teuteufale. Ma ole a manaomia ai ona sefe uma mai a tou lapisi plastic, atigifagu, mai lava ile mea vili taliga, e ‘oti ese le mea ua palapala ae faaaogā le ‘au plastic, ile straw ole apainu, ma isi mau lapisi plastic, pei o tagata pepa iila, ole a faaaogā uma ile a’oga lenei.
E uma atu lava le a’oga ma alu le tamaititi ia e gaosi ana oloa ma faatau loa, nai lo le feoai solo ile taulaga e faatau oloa mai isi tagata. Ole tomai lea ole a tufa atu i fanau nei, na talanoa Siliniu, ole masina talu ai na malaga atu ai i Saina, ma faaaogā ai lona taimi e alu ai i falegaosi oloa i Saina e a’oa’o mai ai le gaosiga aemaise o oloa e faaaogā iai lapisi plastic.
“Ose tasi lea sao ole Toomaga, ile faaitiitia o lapisi i Samoa, aemaise lava i plastic.” Ole vaiaso talu ai na faaliliu ai le faletaavale oi totonu ole lotoā e avea ma faleaoga, ma faasolo atu ai lava ina faatumu loa i tamaiti. Ole fuafuaga ina ia fau laulau uumi e toso i totonu, e faatino ai galuega a’oa’o.
Ma le faamoemoe, e uma ane galuega fai, taeele tamaiti ma sui o latou lavalava, faato’ā tausami ai loa a latou supo vevela a’o lei o ile fale. O a’oga ole a vaevae i vasega ole taeao ma le aoauli, ona e laititi le faleaoga, ma e iai foi le van e momoli ai tamaiti nei ise nofoaga e faigofie ai ona oo io latou aiga.
“Ole galuega a leoleo le vaai o tamaiti nei”…Palemia Tuilaepa
Na talanoa ai le alii Palemia, i lana polokalame faalevaiaso ma Tusitala, “o fanau na e faatauoloa, e tatau lava ona o ile a’oga. Ae ole galuega a leoleo e fai ole vaai o tamaiti na, pe aooga.”
E talitonu le Palemia, ole tomai na faavae mai ai le aufaioloa tetele o iai nei ile taulaga, ole tomai, e tutusa lelei lava ma le tomai o tamaiti ta’ilima tausaga lea e feoai nei, ole faatau mai ma toe faatau atu ina ia maua lava sina polofiti. “
“O mea faapenei e lē mafai ona taofia le tafe mai i fafo o ituaiga mafaufauga eseese, ae aua ne’i galo e iai le tatou aganuu, o aganuu na aumai ele Atua e tatou ola ai ile 3afe tausaga talu ai, seia oo mai papalagi, e o mai palagi ua iai le tofa mamao e lima ta’ita’iina ai tatou.
“E lē faapea e agi mai le matagi o suiga, ona tatou seetia ai lea ma talia ma le pogisa, e tatau ona tatou faaeteete e iai tatou tu ma aga na ola mai ai, ae soia le televavae, e faatulaga tagata ma faapea o tagata leaga ma tagata lelei.”
Ole faasalalauga na aumai e Malo Aufatasi, e leai ni aganuu a na tagata. Ae e lē o manao e faataitai i tu ma aga i fafo, auā e iai tatou aiga, e tua iai o tatou tagata, o tatou o Kerisiano.” Pei ona talatala le Palemia e faatatau i tamaiti lava nei e faatau oloa ile taulaga.
