E manatua pea le Afioga ia Lemalu Tate Simi le Hai Komesina maualuga o Samoa ua faiilagi le folauga i lana folasaga sa faia i le Tausala Samoa i le Laluna Lounge 2010 na ia luitau ai le mamalu o le atunuu ma fanau i Sini ma Ausetalia nei ia tausinio mo mea lelei aemaise le alualu i luma o Ausetalia nei.
O le vaiaso na tea na faamanatu ai i Ausetalia ana sao e tele (inventions) ua faaaogāina nei e le lalolagi atoa e pei o le Black Box i totonu o vaalele lea e saili mo toe minute a o lei palasi ma faatama‘ia faigamalaga a vaalele.
O lenei ‘pusa uliuli’ e lē faatama‘ia pe a mu le vaalele pe goto foi i le loloto o le sami poo se pomu foi. O le alii talavai (chemist) ia Dave Warren na ia fausia le uluai ‘pusa uliuli’ i le 1958. E iloa lelei ai e tagas ta suesue faamatalaga ma talanoaga faaiu a pailate i le mea sa tupu ae lei maliliu. O se pusa e aogā tele mo sailiiliga auā le toe faaleleia o nisi o itu i vaalele ia foia ai le toe tutupu o faalavelave e maimau ai soifua.
O le isi vaega tāua o le Wi-Fi poo fesootaiga faaaupega tafaiilagi feaveai lea e maua i soo se nofoaga e latalata i ai komepiuta feaveai ma telefoni feaveai. E faigofie ai fesootaiga i imeli ma isi auaunaga faatekonolosi. Na amata mai i le 1992 na fausia ma faataitai e le alii Ausetalia ia John O’Sullivan le Wi-Fi a lea ua soo ai le lalolagi. O Ausetalia foi na gaosia le uluai pusaaisa (fridge) i nei faamaumauga. O pomu faatonutonu i lalo o le sami ma le vai (underwater torpedo) na muamua fau e Louis Brennan mai Melepone o se faiuati (watchmaker) faatoa luasefululua ona tausaga.
E lē gata i lea o isi anoanoai o mea aogā na mapuna mai Ausetalia e pei o le Auvili uila (electric drill) i le 1889; o le Note pad i le 1902; Ata tifaga (feature film) i le 1906 a Charles Tait; Tank poo le tane tau i le 1911; Pacemaker poo le fatu fai i le 1928; Fualaau penicillin i le 1939; Ultra sound i le 1961; Digital Sampler mo faaili 1979; Bionic ear poo taliga faaleotele leo i le 1978; aemaise le Google maps i le 2003; e faigofie na saili ai tuatusi ma nofoaga. O le sao lenei o tagata sogasogā ma sailiili i Ausetalia nei o loo tausinio i ai nisi o alo atamamai o Samoa i aoga, kolisi ma Iunivesite. Talosia ia vave faamanuia ai se alo o Samoa ma viia ai le alofa o le Atua.
