Manuia lau malaga Tofilau Tolutasi Masoe Potoi (Minchinbury Mt Druitt NSW)
O upu o le Tusi Paia, “Amuia e faanoanoa, aua e faamafanafanaina i latou”. “O le oti foi o lou manuia lea a o lou ola ua ia Keriso lea.”
E ui o se fualaau e inu gata pe a oo ina ufitia i ao pogisa o le maliu ma le oti, ona o le misia o mafutaga ma aiga pele pe a mou atu i lenei olaga, peitai ua mae‘a ona fofola faavae manino o le Afioga Paia a le Atua e iai le faamoemoe i tua atu o le tuugamau e toe faatasia ai aiga pe afai tatou te tumau ma tausi poloaiga a le Atua i luga o lenei fogaeleele.
E ui ua leva ona feagai Tofilau Tolutasi ma tiga o lenei soifuaga i gasegase o le tino peitai ua malolo atu i lona nofoaga mau e faatali ai le aso e afio mai ai le Alii ma siitia o Lana fanau faatalitali.
O le aso 23 o Ianuari 2015 na faamānavaina ai e le Atua galuega a Tofilau Tolutasi Masoe Potoi, i le maota gasegase o Blacktown Hospital i Niu Sa Uelese, ma e maliu o ia ua toe o ni nai aso atoa le 58 tausaga o lona soifua.
Ia momoli atu faamaisega i le tina loto faavauvau ia Nofoa Faiumu Masoe Potoi faapea le nofoaalo ma grandchildren faapea aiga uma lava ona o le misia o mafutaga mafanafana. E ui o loo oia pea i tiga o le maliu ona o se tasi o le fanau na toesea i le fā tausaga ua tuanai aemaise o mātua, peitai o Iesu lava ia e faamafanafana i ē loto faanoanoa.
E le galo au galuega lelei Tofilau Tolutasi ma lou aga mālie ma le tausaafia i taimi a o e soifua mai, ua o se fugalaau e matala mai pea i taimi uma e manatua ai oe e ou aiga aemasie le Tina ma le fanau.
O alofaaga ma faamaisega e auina atu i aiga uma lava ma uo mamae aemaise o le Ekalesia Aso Fitu o le Toe Afio mai i Mt Druitt, o aiga foi i Niu Sila, Samoa ma Ausetalia. E auina atu foi faamaisega i le Susuga i le faafeagaiga ia Pr Tusitina ma Lata Faiumu & aiga faapea aiga uma i Brisbane ma le Penina o Asuisui Switch 1197am.