E suifeiloi ma felanulanuai manatu ma lagona faaalia o nisi ile faamanatuina o le atoaga o le 54 tausaga o le Malo Tutoatasi o Samoa i lenei tausaga. O nisi ua latou misia le malae o le sailigamalo a le atunuu i Tiafau e masani ona faia ai le sauniga o le sisiga o le fu‘a.
O nisi ua fiafia ile suiga ua ave ai ile malae o le taaloga hockey i Tuanaimato e faia ai sauniga masani o le aso muamua. O nisi sa talanoa i le manaia o aso malolo o le tutoatasi o le a fai ai nai tafaoga ma fiafia ma nisi o uo ma aiga tafafao mai fafo.
E seasea toe talanoa se tagata talavou o lenei augatupulaga ile sao o mātua ma tuaa ma le lautele o le atunuu sa asaina mai le tele o faaletonu o faafitauli ma faigata i le sailiga o se Malo e pulea lava e tagata Samoa.
Atonu ua mafua lea tulaga ona ua lē toe faamamafaina i aoaoga le talafaasolopito o sailigamalo a Samoa, ae pe o loo aoaoina ai lava fanau ae ua lē toe iai se tāua ia i latou ona ua mamao tele i tua tausaga sa asa mai ai se sailiga o se malo tutoatasi.
O le malelega faamanuia a le afioga ile Ao o le Malo sa tomua lava i lona saunoa mai o le mafuaaga o le sailiga ose malo tumaoti o le toe faafoi mai o le tofi o tagata Samoa.
O le tofi lea o ona eleele ma measina o lana tu ma lana aganuu aemaise o le olaga faasamoa o le isi tofi tāua o le tagata Samoa. O se vaega amata o lana malelega faamanuia na ia malele ma saafi ai i le tāua o le sao oi latou na amatamea ma faaauau mai ai le sailiga o se malo tutoatasi. “Pe ā ma le selau ma le fitu tausaga ua tuanai, na sii ai le folauga a mātua i se malaga e umi ma fītā. O le sini o le faamoemoe, ina ia toe faafoi mai le tofi o Samoa i tagata Samoa. E mafua ona o le talitonuga, a vale tuulima le tofi, o le a mou ma fano ia mea e mamafi ma ganea ai le olaga o le tagata Samoa. Ua tatou aofaga potopoto i le asō e faamanatu ma faailoga le latou sailiga malo”.
“O le aso lenei, tatou te faailoga ai le 54 tausaga talu ona toe faafoi mai le tofi o Samoa i tagata Samoa. Ua 54 tausaga o tatou tu i le foe e faatautai le tatou mau tuufaasolo, le tatou tu ma le aga, le tatou gagana, eleele, ogasami, faapea ai ma le tatou faigamalo.”
“I le faatautaiga o le tatou malo tutoatasi, ua tatou faailoa atu i le lalolagi, tatou te iloa tausi le filemu ma faatautai se malo pulea; tatou te iloa puipuimalu i aiā tatau a o tatou tagata ma tatou te iloa faafoe se malo ma se atunuu e malu ai le tulafono. Ma e tainane lo tatou laitiiti ma faatauvaa, e lava tāoso lo tatou malosi ma le tatou pulunaunau, e malupuipuia ai le mea lelei ma amiotonu mo i tatou”.
“Tatou te faatuatua ola o matati‘a ua tatou ausia o ni faamanuiaga mai le Atua. Fai mai le tatou tagavai, o Samoa e faavae i le Atua. O le tatalo lea a o tatou mātua, ma o le tatou tatalo foi lea i le taeao lenei”.
“O i tatou nei o ni tagata e mafi i le olaga faaleagaga, o se olaga e opogi ma apoapo tagata, ae lē faailoga tagata pe suesue masei. E loto maualalo, alofa ma agaga faamagalo. E agalelei ma lotomau. E lē mafua ona o se taui ae māfua ona o le manuia lautele o tagata”.
O nei aso o le talutalu fou o le tele o fesuiaiga o le olaga i le ola a‘e o fanau ma tupulaga talavou o se itu tāua lea i fuafuaga a soo se Malo o le faaolaola pea i loto ma lagona o fanau, le sao oi latou sa sailia se Malo Tutoatasi o le atunuu. O le tāua o le faaolaola pea i totonu o aoaoga ona o le a taofiofi ai pea i loto o fanau ma le tupulaga le tāua o le faamanatuina o le tutoatasi poo le Sisigafu‘a. Ia fai ma sauniga e teu fatu le tāua ma ia faatino pea i tausaga uma.
