A o loma le taaloga faavaomalo muamua a le Manu Samoa ma Georgia, ua faaalia e le faiaoga a le ‘au, Namulauulu Alama Ieremia, le Pulega fou a le Manu Samoa ua iai mo lenei tausaga.
O lea pulega fou o le a fesoasoani ile faiaogaulu mo tapenaga a le ‘au mo ana taaloga faapitoa. O Darryl Gibson mai le Warratahs ma Kane Thompson ua avea ma Fesoasoani Faapitoa. O Grant Henson o le faiaoga o Osofaiga Faapitoa (Set piece), Richard Watt ua faaigoa o le faiaoga o le laina i luma (forwards). O le taitai malaga o Brian Hoply, ma le faiaoga o le tomai faalakapi ua filifilia i ai Daniel Parks mai Ausetalia.
Na ta‘ua e Namulauulu e faapea ua matuā fiafia tele o ia i le Pulega fou a le Manu Samoa. O nei suiga ua faia ona o le faaletonu tele sa aliali mai ile taaalo a le au ile Ipu o le Lalolagi, ma o le pulega ua iai nei, o le a vaaia ai se suiga tele ile taaalo a le ‘au. O le tausaga muamua lenei o Namulauulu ile faiaoga ulu o le Manu Samoa, ae o suiga ua ia faia, o le a le taumate le tulai mai o ia, o se faiaoga numera tasi mo le Manu Samoa.
O Richard Watt e sau mai le pulega a le Wellington Hurricanes, ma o lona tomai faapitoa o le koleniga lea o le laina i luma ile taimi e togi ai le polo i totonu o le lineout. O Grant Henson e sau mai le ‘au a Counties Manukau. E silia ma le selau ana taaloga mo Counties Manukau, ma o lea ua faiaoga ai nei ile ‘au faaitumalo a Counties Manuku.
A o le mea o le faailoa mai lea o igoa o faiaoga a le Supa Lakapi e fesoasoani i le Manu e pei o Watt ma Gibson. O le iai o Gibson ma Watt i le li‘o a le Manu Samoa o le a mautinoa le lelei tapena o le ‘au, ma tele se tomai o le a sasaa mai mo tama taaalo.
O nei foi alii ua tulimatai mai e ‘au a Peretania e pei o Egelani ma Uelese mo tofiga faiaoga. O Darryl Gibson sa taalo o ia i le ‘au a Canterbury ma le Crusaders ile Super Rugby sa taalo foi ile All Blacks mai le 1999-2002, ma e sefulu ma le iva ana taaloga mo le aufili a Niu Sila.
O le tausaga muamua lenei ua avea ai o ia ma faiaoga a le Warratahs i Ausetalia. O lana taaloga muamua mo Niu Sila o le taaloga lea ma le Manu Samoa. Na ia ta‘ua e faapea, “E tele tama taalo lelei a Samoa o le mea foi lea ua ou fiafia tele e fesoasoani ai ia Alama ma le Manu. O le mea lelei, o loo faauluulu ia Alama le Pulega o le Manu ma o le a ou taumafai ou te fesasoani mai ile Manu Samoa.”
Na ta‘ua foi e Gibson o le taleni a tagata Samoa ile lakapi e lē fesiligia, ae a maua loa le tomai e vaavaalua ma le agavaa o loo maua mai le taleni, e matuai maualuga se tulaga e oo i ai le Manu Samoa.
“E tele naua galuega a Alama ua fai i le valu masina talu ona avea o ia ma faiaoga a le Manu. Aemaise le vaavaai lelei i tama taalo a Samoa oi Europa. E lē o se mea faigofie lea galuega a o lea ua faatino e Alama.” Faaalia foi e Gibson lona fiafia tele e malaga mai i Samoa i taaloga e lua a le Manu, ma le taaloga ma Fiti e fai i Suva, auā se malologa mai le fita o lana galuega o loo iai nei, o le Faiaoga mo le Warratahs.
Lisi o le Pulega a le Manu Samoa
Faleomavaega Vincent Fepuleai – CEO SRU
Namulauulu Alama Ieremia – Faiaoga
Daryl Gibson, Kane Thompson – Fesoasoani Faapitoa
Richard Watt – Faiaoga Foueki
Grant Henson – Faiaoga Tomai Faalakapi (Skills)
David Edgar – Faiaoga o le Malosi ma Tapenaga a le ‘Au
