Auē ua tagi auē Rasela ma lagona le leo i Rama ina ua faamanavaina e le Atua le soifua o lana auauna le susuga i le Tamā Malolo Manumalo ia Rev Setu Masina. E le faagaloina le tautua matavela a lenei Tamā iloga i totonu o le Talalelei, a o lona sao tāua na tautua ai foi i le atunuu i le laumua e ala i soo se faalapotopotoga e auauna ai.
O le Aso Sa, 30 o Tesema na faia ai lona lotu faaleaiga i le Ekalesia PIPC i Newton i Aukilani. O se sauniga matagofie ma le toatele sui o le Aufaigaluega Paia na auai atu e faaali lo latou valevale alofa ma faamavae atu i le Toa o le Talalelei.
Na matagofie foi ina ua auai ni isi o faafeagaiga mai le Atu Tokelau na malaga atu lava mai le laumua nei i Ueligitone; susuga i le Toeaina o le EFKT Rev Tui Sopoaga ma le faletua, Rev Salesa Silila ma le faletua, Rev Linda Hope ma Rev Iutana Ekuata.
O le vasega mamalu foi o le Aufaigaluega o le PIPC i Aukilani na auai uma, ma o le susuga lava i le Toeaina ia Maafala Koko na taitaia sauniga e lua i le lotu faaleaiga; Aso Sa 30 ma le Aso Gafua 31 o Tesema i lona sauniga faamavae/falelauasiga.
O molimau foi o le Susuga Setu Masina na saunia lava e ona alo ma le tina pele ua tuua ia Faalua faapea o la alo faaleagaga: Rev Maafala Koko, Rev Fakaofo Kaio, Rev Alofa Lale.
O si ana uo mamae ia Rev Ned Ripley sa molimauina lona soifua a‘oa‘oina seia oo ina filifilia e faifeau i le Ekalesia Christ the King PIPC Porirua ma ritaea mai ai lava.
O le susuga ia Rev Perema Leasi na saunoaina le molimau a le Ekalesia PIPC i Porirua na tautua ai Setu ma Faalua mo le 30+ tausaga.
Na malaga faapitoa lava le susuga i le Taitaifono o le Perepereane i Ueligitone a o le Faafeagaiga Taulagi foi a le Ekalesia Christ the King PIPC Porirua o Rev Perema Leasi ma le faletua faapea le tina malolo ia Fagamalama Erika ma le Ekalesia PIPC i Porirua mo toe sauniga faamavae o le Tamā.
Na faapea foi le toatele o le tupulaga talavou na faavaeina mai e Setu Masina i le la galuega amata i Porirua na malaga mai ni isi mai Ausetalia faapea ma soo se itu o Aotearoa nei ina ua faalogo i le tala faanoanoa, lea na faatumulia ma matagofie ai sauniga faamavae o lea auauna aogā a le Atua.
Ina ua mae‘a sauniga faaiu e pei ona lagomau ai nei Setu i North Shore Cemetery, na faatasi uma atu loa le mamalu o le aofia i le Maota o le Event Centre i Ellerslie, na tali ai le sua ma alo foi aiga na lua i faaaloaloga matagofie e pei ona masani ai le atunuu.
E momoli tele atu faamaisega i le Tina ia Faaluaomete Masina ma le nofoaalo. Loto tetele ma faatuatua auā o la le Tusi: “O e ua oti oi le Alii. Amuia e faanoanoa aua e faamafanafanaina i latou”.
