Talu ona mae‘a sainia i le va o le Malo o Samoa ma le malo Ausetalia le maliega e agavaa ai Samoa i le polokalame o galuega faavaitaimi i faatoaga i Ausetalia, e lei faatinoina ni talosaga mo ia galuega e pei ona faaalia e le Pule sili o le Matagaluega a le Palemia ma le kapeneta.
Faaalia e le pule sili le faletua o Vaosa Epa, o loo faatali pea i se isi tala mai i lea Malo i le taimi e amata ai ona faagaioia talosaga mo ia galuega, ae o loo iai le talitonuga e tatau ona oo atu i le masina fou o Fepuari ua maua mai se isi faaaliga.
O le matagaluega o leipa a lea malo o le a iloiloina talosaga, ma o le matagaluega foi lea o le a faato‘ai i ai manaoga o kamupani ma tagata e iai faatoaga tetele i Ausetalia o le a manaomia ni tagata faigaluega.
O loo faamoemoe foi le numera o tagata mai Samoa e mafai ona maua ia galuega i le manao o ia kamupani, aemaise o le taunuuga o iloiloga o faamatalaga o tagata taitasi o le a talosaga. Faaalia e Vaosa e lei amataina le polokalame ae ua toatele le atunuu ua fesootai atu poo afea e amata ai.
O lona uiga o loo maualuga le manaoga o o tatou tagata il e fia maua o se avanoa mo ia galuega faavaitaimi ona e lelei le totogi i le itula, aemaise e maualuga le aogā o le tupe Ausetalia pe a faaliliu i tupe Samoa.
