Pue le MTV atoaga 20 tausaga pese o le “Tama a Samoa”

O le au lakapi taitoafitu a le Manu Samoa ua taualuga i ai le pueina o le ata pese poo se MTV o loo autū i le pese o le Tama a Samoa na tusia ma fatuina e se tasi o tamalii lauiloa o le atunuu i le musika le susuga Asuao Felise Mikaele.

O le matafaga o le faletalimalo o le Faofao beach fales i Saleapaga i le atu Aleipata sa pueina ai le vaega mulimuli o le ata pese i le vaiaso na tea nei, lea sa faatino ai e le au lakapi taitoafitu a le Manu Samoa taga ma gaioiga e fua i upu o lea fatuga alumia i le faafofoga a le atunuu.

O le susuga Asuao Felise Mikaele ma lona faletua o loo faatinoa le pueina o le ata, lea o loo aofia ai i totonu ma nisi o alii ma tamaitai talavou o le atunuu na filifilia mai le to‘a 120 na talosaga mo le fia maua le galuega o le faatinoina o gaioiga ma taga o le ata.

Faaalia e le alii pese o loo iai ma ni lagona faaalia o nisi o taitai o le Malo ma le atunuu e faatatau i le pese o le Tama a Samoa, e pei o le Pule Sili o le Iuni lakapi le susuga Su‘a Peter Schuster, faapea le afioga i le alii Palemia ma le Ao Mamalu o le Malo.

E lua ni au siva Hip Hop mai le afioaga o Leauvaa o loo aofia ai foi i le ata, ma o se taumafaiga e faamanatu ai le atoaga o le 20 tausaga talu ona salalau i le lalolagi o tagata Samoa lea pese a le susuga Asuao Felise Mikaele.

O loo fesoasoani foi le faletelevise o le TV3 i Samoa i le pueina o lea ata pese. O Aperila o le tausaga nei o loo fuafua e faalauiloa ai lea ata pese poo se MTV.