“Ua 116 a tatou sui tauva ma o se aofaiga toatele”…Tuilaepa
E ui e faapea o se numera toatele le 116 o sui tauva o le vaega faaupufai o le HRPP, peitai e lē o faigofie i le ta‘ita‘i ma le komiti o tapenaga a le itu a le Malo ona soalaupule le nonofo faafeagai ai o sui tauva fou ma sui faipule o le HRPP o tauaveina nofoa o le Palemene i le taimi nei.
“Ua iai aiaiga ma faiga faavae a le tatou vaega ua agai i ai le tatou komiti, ina ia mafai ona alofia ai nisi faaletonu e ono tulai mai”.
O le finagalo lea o le ta‘ita‘i le afioga i le Palemia susuga Tuilaepa L Sailele Malielegaoi, ina ua ia tau faamalamalama i le feiloaiga ma sui tauva e lē o ni faipule ma sui o loo tauaveina tofi o itumalo i le Palemene. O le 116 o sui ua faamauina i le lisi o le au tauva a le HRPP, o se aofaiga tele pe a fua i faigapalota ua tuanai. O loo faigata i le silasila a le ta‘ita‘i ma lana komiti itumalo e tasi le nofoa i le Palemene, ae toalua pe sili atu sui tauva o le vaega faaupufai. “Tatou te mananao i le manumalo, ae afai o le tulaga lea e aliali mai, e lē ausia e tatou le manulauti o le faigapalota”.
O loo tele pea le avanoa e toe fetuunai ai le tofa ma le faautautaga i sui tauva o le vaega faaupufai e pei ona saunoa le alii Palemia, ma e manino mai i lona finagalo e tatau i nisi sui ona tapuai ae lafo i se toatasi pe toalua pe afai o se itumalo e lua nofoa i le palemene e fai ma o latou sui. Pe a fua i le tulaga ua iai nei le au taufetuli mo le HRPP i le palota o le 2011, ua sili ona toatele o latou sui faatutu i nisi itumalo pe a fua i le faipule o umia le nofoa i le taimi nei, o loo tutoatasi pe lagolago atu i se isi vaega faaupufai e pei o le Tautua Samoa.
O le itumalo o Palauli i Sasa‘e e toatolu sui o le HRPP ae tasi le nofoa o lea itumalo ma o le faipule foi o loo seei ai nei, o se tutoatasi sa ia lagolagoina le Tautua Samoa a o lei soloia nofoa o nisi o faipule o lea pati ma faia ai faigapalota laiti ona o le malosiaga o teuteuga fou o le Tulafono Faigapalota.
E faapea foi i le itumalo o Palauli i Sisifo, o lona sui faipule e tutoatasi ae lilifa lana lagolago i le Tautua Samoa, ae o sui ua fuafua e tauva ai o le HRPP e toafā. O le fautuaga a le ta‘ita‘i i sui uma na auai, e toe mafaufau auā sa tupu muamua foi i isi faigapalota le lē logosaia e sui o le HRPP o le fautuaga na ave i ai, auā na manumalo mai le isi sui ae faiaina uma sui o le latou vaega faaupufai.
O le aso 15 o Fepuari ua faamoemoe e faalauiloa ai le lisi mulimuli o sui faatutū poo sui tauva o le HRPP a o lumanai le aso 18 e tapunia ai le faauluina o sui tauva.
O le suiga o teuteuga o le tulafono o faigapalota ua ese ai le aso e faamuta ai le toe faauiina i tua o suafa o sui tauva lea o le a palasi i le aso 25 o Fepuari 2011. E lē pei o tausaga ua mavae i isi faigapalota a le atunuu, o le aso lava na tapunia ai le faauluina o sui tauva o le aso foi lea na faamuta ai ma le toe aveesea i tua o suafa oni sui.
