A ua faasaga nei i ai le tagi a le Komiti Faafoe lē tumau
Ua mae‘a ona valaau molimau a le itu a le Peresitene ma le Komiti faafoe o le Koluse Mumu e lagolago ai le mau a le itu tagi, ua lē usitaia e se isi vaega o sui o le faalapotopotoga le poloaiga lē tumau a le faamasinoga (injunction) e taofia le latou fono faapitoa na faia ia Aukuso 2010, lea na filifilia ai se komiti faafoe e tauaveina le pulea o galuega a le Koluse Mumu mo se taimi lē tumau. O le faaiuga a le faamasinoga i lea talosaga poo se tagi sa tuuaia ai nisi o sui auai o le Koluse Mumu, ua faaleaogā ma soloia e le faamasinoga.
E lei aumaia mafuaaga o le iuga ae na faaalia e le alii faamasino o Justice Slicer o se taimi ona maua lea o lana faaiuga tusitusia ua iai ma mafuaaga.
O le Aso Gafua, 13 o Tesema 2010 na valaauina ai lenei mataupu, e mafua mai i le vevesi sa aafia ai le Peresitene le afioga Muagututagata Peter Ah Him ma lana komiti faafoe, ma se vaega o sui auai o le faalapotopotoga. O le vevesi lea na mafua i le tuai ona valaauina o se fono faaletausaga e faamalamalama ai tala o tupe o fesoasoani o le sunami ma isi foai sa tuusa‘o i le Koluse Mumu, atoa ai ma ni tuuaiga sa aafia ai le Peresitene i lona faaaogā sese o tupe a le faalapotopotoga.
O Mati o le tausaga ua mavae 2009, na filifilia ai le Peresitene o iai nei ma lana laulau, peitai e oo ane lava i le masina o Aukuso na aliali mai ai le vevesi e lei valaauina se fono faaletausaga.
O le mafuaaga lea na tāloina ai e nisi o sui o le fono aoao a le Koluse Mumu poo le General Assembly le fono faapitoa e tofia ai se laulau e tauaveina le pulea o meatotino ma galuega a le Koluse Mumu, ae na fetaui lea gaioiga ma se poloaiga a le faamasinoga na talosagaina e le Peresitene ma lana komiti faafoe.
O le teena o le tagi a le Peresitene i tuuaiga o le lē usitaia e sui o le faalapotopotoga o le poloaiga, ua agai atu ai le itu na faasaga i ai lea tagi, e finauina se latou talosaga ua i luma o le faamasinoga o loo finauina ai le talafeagai o le latou fonotaga na tāloina, lea na filifilia ai ma se laulau poo se komiti faafoe lē tumau.
O le Aso Lua, 14 o Tesema 2010 na amata ai ona valaauina molimau o le finauga lenei.
O le molimau a le tofa Vaasiliifiti Moelagi Jackson o ia sa avea ma failautusi lē tumau e faamaumauina taualumaga o fonotaga sa faia e amata mai i le aso 5 o Aukuso e oo i le aso 13 o le masina lava lea, na mafua ona valaau le fono faapitoa ona ua uma le taimi e tasi le tausaga o le Peresitene ma lana komiti faafoe na tofia ia Mati o le 2009.
O loo taoto nei i le faamasinoga molimau ua mae‘a ona fofogaina o lenei finauga ma o le a aumai i ai se faaiuga a o lei mae‘a galuega a le faamasinoga o le tausaga nei 2010.
