E iai se manaoga ua fofola e le taitai o le vaega faaupufai a Maoli (Maori Party) o Dr Pita Sharples ina ia iloiloina e iunivesite uma i totonu o le atunuu, se avanoa e ulufale sao atu ai fanau a Maoli i totonu o aoaoga faaiunivesite, e aunoa ma le tau faatali seia pasia le togi lea e tatau ai ona ulufale se tamaitiiti i iunivesite e pei ona iai i le taimi nei.
Taua e Sharples, e maulalo le aofai o fanau Maoli o loo oo atu a latou aoaoga i tulaga o iunivesite, ma o se faanoanoaga lea pe a fua atu i le toatele o fanau Maoli o loo iai ae ua le mafai ona latou maua nei faamanuiaga tau aoaoga, ona o le maualuluga o nisi o maka ma taiala o loo faatulaga e iunivesite e tatau ona tauivi fanau aoga e ausia mo le ulufale atu i ai.
O le manatu o Dr Sharples, e le faapea e maulalo le tulaga tau aoaoga o fanau Maoli, aua ua faamaonia lava le tele o tomai o loo iai i nisi o nei fanau pe a latou maua le avanoa e faalautele ai o latou tomai. Ae talitonu Sharples, e le o lava le tele o na avanoa o loo tuuina atu i fanau a Maoli.
O Dr Sharples, o ia o le minisita lagolago o le matagaluega o aoaoga, ma o lana saunoaga sa faia i se faatasiga i le Iunivesite a Vitoria i Ueligitone (Victoria University) na ia taua ai lona manaoga lenei mo fanau a Maoli. Fai mai Dr Sharples, i le tausaga e 2007, e na o le 63 pasene o tama talavou, ma le 67 pasene o teine talavou Maoli, na faaiuina a latou aoaoga ma se tusipasi o le vaega muamua a le NCEA, e sili mamao atu ai fanau aoga a papalagi (Pakeha), lea e tusa ma le 83 pasene o tama talavou ma le 89 pasene o teine talavou papalagi sa ausia lena tusipasi.
O le itu e faavae ai le mau a le alii minisita e pei ona ia taua, i le taimi nei soo se tasi lava ua 20 pe sili atu ona tausaga, o loo mafai ona ia aveina ni mataupu i le iunivesite e aunoa ma le tau pasi mai suega a aoga maualuluga. O le manaoga foi la o Dr Sharples, ia tatala atu i fanau aoga a Maoli lea avanoa.
E talitonu se tasi o alii faiaoga Maoli, Ranginui Walker e tatau ona aogā lenei faiga e pei ona finauina e le sui faipule, pe a fua i le tulaga manuia o aoga a le Te Wananga O Aotearoa, lea o loo saoloto tagata e aooga ai. E ioe foi le sui pule o le Iunivesite a Aukilani, le alii o Stuart McCutheon, i le manatu faapea e tatau ona uunaia malosi fanau Maoli e aooga i Iunivesite, ae lē talitonu McCutcheon o le tatala faapea o le ulufale atu i nei iunivesite o se auala lelei lea e fai ai. Fai mai Professor McCutcheon, o le mea tonu e moomia, ia lava se seleni e faagaoioia ai nisi polokalame a iunivesite, e galulue faatasi ai ma aoga maualuluga (secondary schools) e tapena ai fanau Maoli mo nei aoaoga faaiunivesite.
