Matautia faasalalauga lapatai mo tupulaga avetaavale

E iai se faasalalauga fou ae fai lava sina ogaoga o foliga o loo momoli mai ai, o le a amata ona faasalalauina i luga o le televise, i se taumafaiga a le pulega o loo nafa ma le saogalemu i luga o auala, e faafoliga mai se ata e ono faateia ai le maimoa a tupulaga o loo fiafia e fai lenei masaniga o le ave taavale onā. O lenei faasalalauga e pei o loo matele mai i le itupa o alii talavou. O loo faaata mai ai se vaaiga i se po ina ua uma se inuga ava i Aukilani i Saute, le vaipanoa o Niu Sila lea e silia ma le 200 tagata e maua ai e leoleo o loo aveina taavale ma onanā.
O le po o le Aso Toonai talu ai na faafuasei ai ona uma le ola o se alii talavou, ina ua le mafai ona ia toe taofiofia le taavale na ia aveina, ma taavalevale ifo ai i lalo mai le auala, ona ua matua ova le saoasaoa. Taua e leoleo, e ui e lei maua uma lipoti o lenei faalavelave, ae e iai lo latou masalosaloga e iai foi se sootaga i le faaaogaina o le ava malosi.
I le na o le po lava ia o le Aso Toonai na tea nei, na loka ai e leoleo le silia ma le 216 taavale i Aukilani i Saute, o se vaega o a latou polokalame ia o loo taulai atu i avetaavale o loo feoai onanā i luga o alatetele. Ma o le pasene toatele o i latou na loka mai ai, e matele lava i alii talavou. Taua e le tamaitai leoleo o loo faaulu i ai le vaega o leoleo o loo galulue i luga o auala, Heather Mills, e toatele naua alii talavou avetaavale e iai uiga faatautala ma le lē mafaufau pe a feoai i luga o auala. Taua e Mills, ‘o le atugaluga tele lava o alii talavou, ona e aliali mai ai uiga le kea ma le lē popole, lea foi e mafua ai le anoanoai o faalavelave o loo tutupu mai ma maumau ai o latou soifua.’
O se tasi la lea o mafuaaga ua fuafua ai le komiti e faia lenei faasalalauga matautia, ina ia toe faatepa ai talavou i le ogaoga o auga e oo i ai o latou uiga le kea a o aveina taavale. Ma e foliga mai e fai lava sina ogaoga o nisi o vaaiga o le a faaalia i lenei faasalalauga. O loo faaalia ai ni vaaiga matautia ina ua mavae se faalavelave tau taavale i luga o le auala, o loo aafia ai ni alii talavou se toalua.
O le po la anapo, le Aso Sa lea, sa fuafua e faaali ai le uluai faaaliga o lea faasalalauga.