Na malaga mai i Aukilani i le vaiaso talu ai, le au fanafana mai lo tatou atunuu, i se taamilosaga sa faatautaia i Niu Sila, le Oceania Shooting Competition, lea sa amata i Waitemata mai le Aso Tofi ae faamae‘a i le Aso Toonai o le vaiaso talu ai. Pe tusa ma le toavalu le au fanafana a Samoa na auai mai, ma sa iai le tele o atunuu o le Pasefika, vaganā Ausetalia sa lei auai mai ona o nisi o tuatuagia.
Na saunoa le peresitene o le Samoa Shooting Federation team, afioga Fata Paul Loibl, o le faalapotopotoga a le fanafana, sa faavaeina i le 2007 i le sauni ai mo le South Pacific Games, lea na faia atu i Samoa. Peitai na saunoa le peresitene, ae muamua atu ua leva lava ona iai le asosi sa amataina lenei taaloga, e pei o le susuga ia Toa Netzler o ia lea o le founder poo lē na amataina le asosi, ma nisi lava o tino matutua o loo iai pea i le atunuu i le taimi nei. Ae pei o le Federation lea na faatoa amata ona mausali ona faiga faavae, e pei ona iai i le 2007 ina ua sauni mo taaloga a le Pasefika.
Na maua e le au fanafana mai Samoa le pine apamemea i le taaloga i le aso muamua. Sa mataina foi le taumafai a le afioga ia Leasi Ioane Galuvao, e pei ona maualuga ai le latalata o lana fana i le tulaga na semanu na te maua ai le apa memea. O loo iai le faamoemoe o lenei asosi e toe faaleleia atili ana tapenaga mo isi taamilosaga o loo lumanai ai.
E iai foi sui tamaitai o le Federation ae i le taimi nei e pei ona saunoa le peresitene, o loo toatele lava i sui alii. Mo le au lava ia na auai i le taaloga a le Oceania Shooting Competition i Niu Sila i le vaiaso talu ai, o i latou nei:
Taitai Malaga – Fonoti Dominic Faagalu Fonoti , Shooters: Fata Paul Loibl (peresitene a le SSF); Leasi Vainalepa Ioane Galuvao (peresitene lagolago o le SSF), Rob Maskell (base in NZ), Eddie Chan Pao, Frankie Chan, Tagaloasa Toddy Iosefa, Siegfried Levi, Raymond Pereira, Douglas Loibl (shooting at the juniors division)
