Ua sasao faaafi lē matineia le solitulafono a nisi o kamupani initaneti, atoa ai foi ma nisi taitoatasi i le faia o kopi o ata DVD ma CD pese ae lē o ni a latou meatotino. Atonu e manatu māmā i ai le toatele o i latou o loo fiafia e faia lea solitulafono, peitai e fai lava si mamafa o lona faasalaga pe afai ae maua ma faamaonia.
O se tasi o nofoaga mo fesootaiga i Otahuhu, na faamaonia i suesuega faapitoa a le Samoa Times, o loo latou faataunuuina lea tulaga lē manuia. E lē gata i lea, ae ua faapea foi ona maua ai le toatele o le mamalu o le atunuu o loo agai atu ma faaaogāina le tautua faagaoi o loo faia e lea nofoaga.
Na asia e le Samoa Times le nofoaga lea i Otahuhu, ona sa molimauina ma masalomia e nisi o le aufaipisinisi, o le tasi lea o nofoaga o loo latou faia le solitulafono, o le kopi faagaoi o ata ma pese.
O le taimi muamua na taunuu i ai i totonu o lea nofoaga, sa fesili muamua i le tamaitai faigaluega sa iai, pe mafai ona latou faia ni kopi o ata DVD ma pese o CD. Sa tali mai le tamaitai, ioe e mafai soo se galuega lava faapea e mafai ona latou faia ia latou masini.
Sa toe fesiligia le tamaitai lava lea e toatasi, pe fia le totogi e fai ai le kopi e tasi. Sa tali mai e $7.
Na toe fesiligia foi poo le ā le umi e faatali ai, ae sa ia faapea mai, e na o le 20 lava minute. Sa taumafai pea ina ia faia se talanoaga faaumiumi se‘i tau faamatuu mai nisi faamatalga pe mata o malamalama le tamaitai lea i lana galuega o loo fai.
Sa faagasolo pea talanoaga, ma sa maitauina ai foliga popole ma le lē mautonu o le tamaitai faigaluega, ma o se tasi lea o tulaga sa atagia ai, o loo ia iloaina lelei le solitulafono o lana galuega o loo faia. Sa tuu loa i ai ma le CD pese, ma le faamatalaga e toe foi atu i totonu o le 20 minute ona piki lea.
O le taumafai lava ina ia faamaonia le tulaga lē manuia faapea, aemaise ai o le lipotia o le mea moni, sa mafua ai lava ona taumafai e fai se gaioiga faapea, ma le manatu o se fafagu aogā tele mo le mamalu o le atunuu o loo fesoasoani e faataunuu lea solitulafono.
E atoa le vaiaso faato‘ā toe foi e piki mai le CD, o le vaiaso foi lea sa toe agai ai le Samoa Times, e toe fesiligia le tulafono mo se isi malamalamaga, ina ia mautinoa o loo talafeagai gaioiga sa faia.
O le feiloaiga ma le alii Loia, se tasi o tamalii o le atunuu e iai lona agavaa faapitoa i lea foi ituaiga solitulafono, ma sa ia ta‘ua ai le tulaga sa tatau ona faatino e le kamupani, atoa ai ma le faamalamalamaina atili o lea foi tulafono e puipuia ai meatotino faapea.
Sa toe taliu i le nofoaga i le mae‘a ai o le vaiaso atoa, ma e lē gata i le pikiina o le galuega sa faia, peitai sa toe fesiligia foi le tamaitai lava lea, pe toatele ni tagata Samoa e agai atu ma talosagaina le kopiina o ata ma pese.
O le tali sa tuuina mai, ioe e fai lava si toatele o Samoa o loo agai atu ma faatagisia lea faiga. Sa fesiligia loa i le taimi lava lea le tamaitai faatauoloa, pe faapefea le tulaga o le tulafono, Copyright. Sa matuā nenefu ai ma le channel i le tau faavasegaina o le mau faamatalaga sa tuuina mai e le sui o le kamupani. Sa toe faatepa le tamaitai i le lapataiga o loo iai le kava o le CD, ma toe fesili lava iai, pe aisea na ia le vaai muamua ai ma iloilo le CD, a o lei faataunuuina lana galuega.
Peitai o lana tali sa faapea, ona o le masaniga lava ma tagata Samoa, atoa ai ma lona manaomia o le galuega, sa lē suesueina ai lea tulaga.
Na toe fesiligia foi, pe o le faiga uma lava ia o a latou galuega, e lē siakiina ma sailia muamua pe faataga pe solitulafono foi le gaioiga e tusa ai ma le talosaga atu o tagata faatau.
O le tali, e leai na o le tuu atu lava, totogi fai loa ma le galuega, ia poo le fai o le galuega, ae totogi mulimuli pe a toe taliu atu e piki.
Sa toe fesiligia, pe ua ia mautinoa o le solitulafono lana gaioiga sa faia, ae sa ata mulimuli ane na faamalie mai. E lei faamalieina le manatu ona e foliga mai o se taaloga i le tamaitai lea le solitulafono o loo ia faia. Sa toe fesiligia ai foi ma faapea atu,
O lona uiga o le faamoemoe o loo faia ai le galuega ona o le tupe maua a le kamupani, ae faapefea le tagata e ona le meatotino, e te lē popole i ai. Leai se tali, ona tuumuli loa lea o le tatou nusipepa ma tuua le nofoaga.
Sa toe feiloai atu i nisi o le au faipisinisi ma tāpā ai ni o latou lagona faaalia, e uiga i le faatupulaia o lenei faafitauli. Sa lagona lava le faanoanoa pe a faalogologo i saunoaga a i latou.
Vili Ieru – Vision Recording and Cassette Otahuhu
E lagona le faanoanoa i lea tulaga, talu ai e fai lava foi si faigata o le faataunuuina o lenei galuega, peitai a maitau atu la i le faia faapea e nisi o le tatou atunuu o le tulaga, ia ua lē manuia tele.
Manatua foi e tusa lava o le gaoi ma le faomea lea ituaiga faiga, auā o le solitulafono lava lea faiga faapea.
O le isi itu e lē manuia ai, ona o lea ua manatu e maua ma le filemu, ae itiiti se tupe e faaalu ai. E tele lava le āfaina o a matou pisinisi i le tulaga e pei ona faamaonia.
Auā o le a lē toatele ai le au faatau e autovaa mai i le faleoloa, ae o le a faamoemoe lava i le kopi e tasi e faatunuuina ai manaoga leaga ma le solitulafono o loo fai.
Afai o loo sue tupe ai ma tele ai pea a latou seleni i meatotino a isi, ia o le mea moni e fiu lava e fai e lē milionea ai lava. Ae a maua ia ona alofa ai lea i le pagatia o le a iai.
Ia lapataia pea le atunuu, ina ia taofi ma taumamao i lea ituaiga faaosoosoga, auā e maua lava ma e fai lava foi si matuiā o faasalaga e feagai ai pe a maua ma faamaonia. Agai mai pea, a lē lava le faasoa e mafai lava ona matou fesoasoani atu, ae aua le mafaufau i auala lē manuia e le tusa ma le finagalo o le Atua.
Taufau Aukuso – TV Samoa ma le Video Centre Otahuhu
E lagona lava foi le lē fiafia ona o lenei le itu, e lē logo mālie i nisi, aemaise lava nai tamā ma nai tina matutua, e taumafai mai lava, tiga lava ona mamao ma lē atoatoa foi le malosi o le tino i nisi taimi, ae afio mai lava e faatau atu a latou ata, ona o le naunau lava i ai. Peitai o lea ua taumafai nisi e faia lea solitulafono, ma lea faiga lē manuia, e faanoanoa ai la, ona ua lē fetaui ma nai tamā ma tina matutua o le atunuu, lea e faaalu a latou seleni, ae fiafia isi e shortcut ma faaleaga ai a matou pisinisi.
E fai lava si faigata, e lē faigofie foi la matou foi galuega o loo fai ona o le naunau lava e tautua le atunuu i se iloa ma se mafai e maua ina ia faamalieina finagalo, peitai e matuā lē manuia lava le tulai mai o lenei faafitauli.
Ou te mautinoa lava e faamaonia le tulaga lenei, o lea ou te iloa e toatele e tutuli mai a latou fanau e faatau atu le ata e tasi, ae faamoemoe i le auala leaga lea e faateleina ai nisi kopi, ma ave i o latou aiga i fafo atu, ia poo totonu lava foi o Niu Sila.
O le lagona e toe faamanatu pea i le tatou atunuu ina ia sōsō mamao ese ma lea faiga leaga. O le naunautaiga ina ia taufai manuia uma tatou i le tulaga o nai a matou foi taumafaiga o loo fai.
Ou te iloa o loo iai foi le isi tagata i le itu i le aai o East Tamaki o loo ia faia foi lea tulaga o le kopi ma faatau i totonu o le kamupani o loo faigaluega ai. Ua oo mai ni molimau e uiga i le tagata lea, ia mania ae tuu loa aua le toe faia. E iai foi ma le isi i Aukilani i Sisifo, o le mea lava lea e tasi o le kopi faananā ma toe faatau atu e maua ai ana tupe, e sili ai le tuu loa.
Tuiataga Faafili – Video Aau Production Manukau
E faigata tele pe afai o le a faaauau pea ona faia lea tulaga. E moni lava nai uso ma tuafāfine o loo matou galulue faatasi i lenei foi auaunaga.
E tatau ona lē fiafia, ona e lē faigofie le galuega, a o lea e foliga mai e selesele ma le filemu ai nisi. Manaia lava pe a faamaonia ma maua lelei le vaega o loo faia lea tulaga.
Ou te auai foi ma lagolagoina le matuā taofia loa ma faauma lea faiga, auā o le a lē gasolo lelei ai foi a matou pisinisi mo le tautuaina o le atunuu. Sailiili atili pea.
E lei maua se feiloaiga ma le faletua ia Eliza Su‘a ma le kamupani a le CCTV, peitai e iai le manatu e lē sala ese ai se finagalo o le tamaitai pule o lea foi auaunaga.
O le mea moni e sao lava ma faamaonia saunoaga a i latou e pei ona ta‘ua i luga. E tele se aafiaga o latou pisinisi pe afai e faaauau pea gaioga lē manuia a i latou o loo osofia pea i tuinanauga leaga o le olaga nei.
E ono faaititia ai tagata faatau i le latou foi maketi, auā o le a maua ma le filemu nisi kopi e ala i le faia faasolitulafono e pei ona lipotia. E lei maua se tonu ma le au faipisinisi a le atunuu, pe o le a aapa loa i le tulafono ma faaulu loa se tagi e faasaga i le nofoaga e pei ona ta‘ua.
Peitai sa atagia lava i saunoaga a nisi o i latou le agaga o le faamaglo ma le lē taui masui i faiga lē manuia ua tulai mai, ae ui i lea o le a talanoa pea, ma silasila i nisi auala ina ia mafia ona faaititia ai le faafitauli.
