O lea o le a atoa le tolu masina muamua o lenei tausaga ae ua molimauina le pipisi malosi o le faama‘i mata o le pink eye, lea ua silia i le limaselau gasegase ua lipoti atu i le falemai mo ni togafitiga, ae lē o faitaulia ai le faitau selau ma selau o tagata o le tatou atunuu o loo maua ae o loo nonofo lava i le fale ma togafiti ai.
O le saoasaoa o le alu a le pink eye ua faia ai le faaiuga a le Matagaluega o Aoga Taaloga ma Aganuu e sili loa ona faia se malologa a fanau ae se‘i togafiti le faama‘i mata e ala i le nonofo lelei i aiga e aua le toe feoai ona o le auala sili lea ona televave e pipisi ai. O le vaiaso nei ua malolo uma ai aoga a le Malo ona o lea fuafuaga ma o le isi lea vaiaso o le tuuga o le kuata muamua o lenei tausaga ua faatino ai lea gaioiga, totoe ai le vaiaso e tasi o le a faato‘ā ave pe a oo i le taimi o le malologa o le tuuaga masani.
O lea foi ua faia ai ma se faaiuga a se tasi o aoga a le ekalesia Katoliko, le aoga maualalo a tamaitai o Sagata Maria i Savalalo e faamalolo foi fanau a le aoga mo le vaiaso atoa lenei ona ua toatele fanau ua aafia faapea ma faiaoga. O le molimau foi lea mai aoga a le Malo ua toatele faiaoga ua lē oo atu mo tiute masani ona o le faama‘i mata ua aafia ai. E lē o iloa la poo malolo foi isi aoga a le ekalesia Katoliko ae na pau lea o le aoga na faamaonia i le Aso Faraile ua mavae o le a malolo foi.
Ua faailoa e le tamaitai fomai o Dr Saine Vaai Nielsen, o loo tumau pea fautuaga ia i latou ua maua i le pink eye o le aua le feoai atu i nofoaga e tumutumu ai tagata poo nofoaga faitele ona e vave ai tele le pipisi o le vairusi ma aafia ai tagata e lei maua. Talu nei ona pipisi le faama‘i e oo mai i le Aso Faraile na tea nei, ua fiu nisi e saili ni vai mata i fale talavai i Apia ua lē maua. E oo foi i le maota gasegase i le faletalavai o le Malo o le faamatalaga e faato‘ā maua mai i le amataga o le vaiaso nei. Na o le faletalavai o le afioga i le Minisita o Faatoaga, Le Mamea Ropati i Sogi na maua ai vaimata a nisi i le afiafi o le Aso Faraile ae o le tala mai e $15 tala i le tamai fagu vaimata. O le tau masani o le vai e $8 tala e lē oo i se sefulu, ae o lea ua matauina ua sii le tau o le vaimata e nisi fale talavai ona ua alumia i le fia maua o se mapusaga o le atunuu mai le tiga o auga o le faama‘i.
O se tasi o pisinisi i lo tatou atunuu e faia ai nonogatupe ua faailoa i le atunuu o i latou uma ua aafia i le faama‘i o fofoga ia taofia le toe oo atu i le ofisa mo mataupu masani, ae valaau atu i telefoni. Ua na o i latou e lē o maua e iai le faatagana e oo i le ofisa o lea pisinisi ona o faaeteetega i le feaveai atu ai ma le faama‘i. O le molimau a se tasi o fomai sinia i le mota gasegase i Motootua, ua toatele foi fomai ma tausi soifua ua aafia ma ua nonofo i o latou aiga se‘i manuia, ma o se tulaga ua faaitiitia ai foi ma le aufaigaluega galulue.
E lē fua tasi i se galuega lea tulaga ma e ui ina faaletonu ai ma fuafuaga masani i le faiga o galuega, ae o le molimau a se tasi o faipisinisi, e leai se mea e mafai i ai o le fofo sili lava o le nonofo o tagata i o latou aiga se‘i togafiti o latou fofoga ona faatoa foi atu lea i galuega. E iai le talitonuga e tatau ona tuu itiitia tagata e maua i le vairusi i le amataga o le masina fou o Aperila.
