O le masina o Novema i le tausaga e 2012 na fai ai le faaiuga a le Malo o le a tapuni le Aoga maualuga e tasi a le Malo i le motu tele i Salafai, ae avane i Salelologa ae faatū le falemai faaitumalo lea sa i Fagamalo i le nofoaga lea sa iai le Kolisi o Vaipouli. O le faaiuga o le vaiaso lea na tatala aloaia ai lea falemai fou faaitumalo ina ua toe fausia atoa le faleaoga mo lea atinae. O se auala ua faapea ona puipui mai ai foi le falemai mai i le taimi o le leaga o le tau ma ua siisii le sami.
O lea la ua mae‘a lenei galuega tele ma e 6 lelei afioaga o le itumalo o Gaga‘emauga Numera 3 o le a mafai ona agai ane i lenei falemai faaitumalo auā le fesoasoani faafomai. Ua iai foi fuafuaga a le Malo e faalautele nisi atinae i lenei nofoaga tele, e aofia ai se falemaliu, o se isi lālā o le tineimu ma tali i faalavelave faafuasei, o se lālā o le Koluse Mumu ma se ofisa o le vaomatua a le Matagaluega o Punaoa Faanatura ma le Siosiomaga.
O le falemai lenei na faatupe e le Malo o Iapani e pei ona foai ai se tinoitupe e tusa ma le $155,857 (tala Niu Sila) poo le $298,000 (tala Samoa) ma o vaega na vaevae i ai le galuega na aofia ai le falemai mo le au tausāvali (outpatients clinic), o le fale failele, o le potu fono mo le aufaigaluega atoa a le falemai ua taofia ai alii ma le falemai ua taofia ai tamaitai. Faaalia e le sui o le Malo o Iapani i Samoa, Kasimazu Shibuta, o le faamoemoe lava o lona atunuu ia iai ni nofoaga e maua ai fesoasoani faalesoifua maloloina ma ia maualuga le tulaga e iai lenei auaunaga i soo se nuu i Samoa. O se fesoasoani ua faaauau ai le va galulue faatasi o malo e lua.
“O le isi vaega tupe e $225, 663.75 na faatupeina i se nonogatupe $150,000 (loan) a le Komiti faafalemai mai le faletupe o atinae o Samoa, faatasi ai ma le fesoasoani mai a paaga a le itumalo, ma le fesoasoani a le tatou malo e $10,000,” o le saunoaga lea a le alii Sui palemia. Na foai foi e le malo tele o Saina se tinoitupe e $50, 000 e fesoasoani ai i le galuega, faatasi ai ma sailiga tupe a le itumalo na maua ai le $30, 000. O lenei falemai o le a faaaogāina e afioaga e amata mai Patamea seia oo i Salei’a ma e silia ma le to‘a 10,000 i latou o le a agai i lenei nofoaga mo fesoasoani tau soifua maloloina.
