Taofi eseese le atunuu i le maea ai o le taaloga i le po o le Aso Toonai na tea nei a le au a le All Blacks ma le au malosi mai le atunuu o Farani i le la taaloga lona lua faavaomalo. Tele sasi o le alii numera 10 a le au o Stephen Donald sa maitauina i le taimi o ana kiki aemaise lava foi le takikiina o sala ma aa o sikoa e lei faamanuiaina foi. O le faaletonu lea ua manatu ai nisi e toatele ua fai si faatamala o le numera 10 ma ua tau iai foi ma sina faalotolotolua poo ia tonu lea mo lea tulaga talu ona agai ese atu le numera 10 tautaua a Niu Sila, o Daniel Carter lea o loo tau faamaea nei lona taimi i Farani. E iai manatu ua folasia e iu ina tofia Luke McAlister i le tulaga lea i le taaloga o loo loma nei ma le au a Italia. E ono misia e Donald le taaloga lea ona o se faaletonu i lona vae.
E manatu nisi e lei faamalieina le matamata i le po lea i gaioiga a nisi o tama taaalo ona o le faatuai ona matuai see i luma le vaa o le All Blacks mai ia Farani ona o nai faaletonu laiti lava. O le faaletonu o le tau ma le maseesee le isi mafuaaga e tuuaia ai le misi o isi sikoa a le All Blacks i le po anapo e ui na faamanuiaina lava le taumafai. O le taimi nei la o loo talitali foi ma sauniuni le au a le All Blacks i le la taaloga lea ma Italia i le vaiaso nei.
O se tasi lava tulaga ogaoga ua tauau pea lava ina vaaia i vaiaso taitasi i taaloga a le All Blacks, o tulafono ia e faatautaia ai le taaloga. I se taimi e lei mamao atu sa faasea ai le loka a le All Blacks o Brad Thorn e le tatau lava ona tasui soo tulafono o le taaloga ua tau le malamalama i ai tama taaalo. O le taaloga o le vaiaso na tea nei sa mataina ai le taumafai a le numera fa a le au, Brad Thorn faapea foi ma le alii o Keven Mealamu ma Maa Nonu. O le iuga o le taaloga lea, Niu Sila e 14, Farani e 10. E iai lipoti o loo taua ai e lei faailoaina e le pulega i tama taaalo le aofai o ni ‘ai e manaomia e malo ai ina ia maua ai foi ma le ipu o le taamilosaga peitai latou te lei faailoaina lava ma iu ai ina kiki i fafo e Piri Weepu le polo ae misi ai se isi ‘ai faaopoopo ina ia tumau ai le ipu o loo tausinio i ai.
