Ina ua faatoa aliae le faatauina o le ‘stamp’ a Maori mo tusifolau a latou o loo nofo sala poo ua ovasiteia i Niu Sila, sa toatele tagata Niu Sila na faaalia le latou le fiafia i le alii Maori lea sa taulamua i lea faiga. Ua mafua le le fiafia, ona sa faapea o se faiga taufaavalea lea ua faia e le alii Maori ma alolofa ai le toatele o Niu Sila i tagata Pasefika.
Peitai ane, ua maitau pea e tagata lautele o Niu Sila, e ui o lea ua molia e leoleo le alii Maori ona o nei faiga taufaavalea, ae o loo agai pea i ai tagata ovasiteia.
I le polokalame a le Tagata Pasefika sa tapue mai i le TV faamatalaga a tagata Samoa o loo lagolagoina le faatauina o lea ‘stamp’.
O se tasi o tama e suafa ia Afakasi Slade, faapea o ia o se faifeau i le Ekalesia Penetekoso, ma o ia lea o loo taulamua i le lagolagoina o le faatauina o le ‘stamp’ a Maori i le $500.
O lenei tama ua liliu lona igoa ia Hohepa Otimi TeAwhitu, ma ua avea nei ia ma aiga o le tamaloa Maori lea, ona sa sulu i ai i le fia maua o se nofomau aua o ia o se tagata ovasiteia.
O tasi tina sa faapea mai: “O le fesoasoani (‘stamp’ a Maori) o se meaalofa mai le Atua.” O le isi tina ua faapea: “E leai lava se mea e popole ai, e taugofie le $500, e le faapea o totogi se $3000.”
Ona o ia faamatalaga na tapue e le TV, ua tuufesili nei le toatele o tagata Niu Sila, pe aisea le mea ua taulamua ai lenei faifeau e soli le tulafono, i lona nofosala lea i Niu Sila? Aisea foi le mea ua taulamua ai e faalauaiteleina se faiga taufaavalea, ma faatautetee i tulafono a le Malo Niu Sila, a o ia o se faifeau sa tatau ona taulamua i le tausiga o le tulafono?
Ua oo mai foi ia te au fesili, pe aisea le mea ua faaaoga ai le suafa paia o le Atua, a o se faiga taufaasese nei tulaga?
Afai o lea ua taulamua lea faifeau i le solia o le tulafono i lona nofo ovasiteia i Niu Sila, ma le faalauaitele o se faiga taufaasese i le faatauina o lenei ‘stamp’ mo tusifolau, e fia nisi tulafono ua solia e lenei faifeau?
Ua fesiligia foi au, i le amiotonu o a tatou faafeagaiga o loo tusi lagolago atu i talosaga a tagata o a latou ekalesia o loo saili visa ma pemita e nofomau pe faigaluega ai i Niu Sila.
Ua maitau foi e Niu Sila, e le na o le pau lea o se taimi ua afaina ai tagata Pasefika i ni faiga taufaasese i Niu Sila lava, ma ua tuufesili pe mafua aisea?
O le isi itu ua amata nei ona agai i ai fesili a tagata Niu Sila, pe faafefea le tulaga o iai fanau a latou o loo ovasiteia i Niu Sila? Aua o le tulafono lava a Niu Sila, e le mafai ona aoga ni tamaiti o loo nofosala o latou matua ma e leai ni nofomau.
Afai ua le maua e ia fanau le avanoa e aooga ai mo le fia tausaga o loo sailia ai se nofomau, o lona uiga ua leiloa faitau, leiloa tusitusi, leiloa faaopoopo ma faaaoga numera. Pau le malamalama ua pue e ia tamaiti o amio o loo vaai i ai i o latou matua, ma aoaoga o loo maua mai i ata o le TV.
Afai ua le aooga tamaiti, afai foi ua leai se faailoga maualuga e maua, ma ua leai se tomai faapitoa, o lona uiga ua leai sona sao i le faaleleia o le tamaoaiga o lona lava aiga, faapea foi ona leai se sao i le faaleleia o le tamaoaiga o le atunuu.
O le fesili, o ai e sese pe afai ua le aooga tamaiti ona o le nofosala poo le ovasiteia o matua? E sese matua, pe sese le atunuu no ese mai ai, pe sese le Malo a Niu Sila?
Afai foi e momoli se talosaga i le Malo e faamagalo latou ua ovasiteia, e faapefea la ona tausi latou e leai ni galuega, leai ni tomai, leai ni faailoga, a o lea e faaletonu le tamaoaiga o Niu Sila? O fale o ai e nonofo ai? O ai e totogiina le faaaoogaina o a latou fanau laiti? Faapefea aiga, na o le tina ma tamaiti ae leai se tama, o ai e tausia? E le faigofie lenei mataupu ma o fesili nei o lea ua fesiligia ai e Niu Sila i latou o loo nofosala i Niu Sila ma naunau e nonofo pea, e ui ua tali le matagaluega o femalagaaiga ua tatau ona toe foi i o latou atunuu.
O le a sou finagalo i lenei mataupu? Ou te talitonu ua alagatatau ona faailoa i le Malo Niu Sila, aemaise o lea o loo fuafua le malaga a le palemia o Niu Sila e asiasi atu i Tonga ma Samoa i le aso 7-10 o Iulai.
