E lima tausaga o se tamaititi i Tufulele na uma le ola i le Aso Toonai na tea nei ina ua lavea i se taavale i luma ane lava o lona fale na tafao ai.
O le tamaitiiti na atoa i le aso na sosoo ai ma le faalavelave le atoaga o le ono o ona tausaga ae ua fa‘imoto lava i lenei faalavelave.
Na taofi e le afioaga le taavale ma le molimau a nisi e taia le tamaititi ae toe alu ai i luga le taavale ma na tusi e nisi o le nuu le numera o le laisene o le taavale ona ave loa lea i le ofisa o Leoleo ae o le molimau a nisi o Tufulele, ua faafetai lava le vave o gaioiga a nisi o matai o le afioaga ma aveese ai loa ma le avetaavale a o lei oo atu le solo a taulelea o le nuu ua aga’i atu i le nofoaga na tulai mai ai le faalavelave.
O le taimi la lenei o loo i le fale maliu a le falemai lea tamaitiiti a o le vaiaso lenei e tatau ona tulai ai lea alii i luma o le faamasinoga e tali i le moliaga o le avetaavale faatamala ua mafua ai le maliu o se tasi.
O le aiga o le tamaititi ua matuā lē talia se faatalatalanoaga i le tiga tele i le tulai mai o lenei faalavelave ae ua o latou ta‘ua ua tuu atu lava i leoleo le mataupu mo le faatautaiga.
