Na tuai gaioiga a se alii talavou na ulufale faamalosi i le fale o se ulugalii o le palagi le tamaloa, ina ua maua atu o lafi i lalo o le moega o le aiga.
O Ianuari o le tausaga nei na magalo ai mai le falepuipui le alii o Sam Suifosa o Vaitoloa ma Siufaga, ina ua uma ona tuli le ono masina o lona faasalaga i le solitulafono o le gaoi ma le talepe fale.
Peitai o Aperila o le tausaga nei lava na toe osofai ai e lea alii le fale o le ulugalii na tagi i leoleo, lea e faapea ina ua taunuu le aiga i se taavale laitiiti, na alu muamua i totonu se tasi o alo tamaitai o le ulugalii e ave se tasi o ona tei ua moe.
E taunuu atu ua salalau solo lavalava ma faamalama luva ua aveese. Na toe alu ane vave i fafo le teineitiiti ma logo ona mātua i le mea ua tupu. Na faavave loa i ai le tamaloa ma le ave taxi ma faia sailiga ma iloa ai ua iai nisi o meatotino ua aveesea.
Peitai na faaauau pea le sailiga seia oo ina tau atu i se tasi o potu o le fale ma autilo ane ai i lalo o se tasi o moega o loo faapupuu ai le alii talavou o Sam, ma o loo ia ofuina se ofuvae o le tamaloa palagi ua 69 tausaga le matua.
Na pue ai loa lea alii ae vili leoleo ma ave ai loka seia oo ina tulai ananafi mo lona faamasinoga lea ua toe faaopoopo ai le mamafa o lona faasalaga ua tasi le tausaga ma masina e ono.
