E faate‘ia le toatele i tala o le maliu o le afioga Tafuamase‘afa Alalatoa Breda Tipi Faitua le Peresetene o le Faamalu o Faalapotopotoga Tumaoti o Samoa le SUNGO ina ua amata ona vaaia faamaisega i luga o le mau upega tafailagi aemaise i le Facebook.
O le aso ananafi lea na tapa ai se finagalo o le Faalapotopotoga ona o le faafuaseia o lenei tala faanoanoa. O se tamaitai ua faatoa 53 tausaga o lona soifua ma o le tausaga na tea nei lea na tofia ai o le Peresetene o lenei Faalapotopotoga tele i totonu o le atunuu.
O Tafuamase‘afa o se tamaitai iloga i le itu tau i aoaoga. Na amata faiaoga o ia i Niu Sila i Ueligitone ma na faiaoga i se tasi o kolisi a Tamaitai i Ueligitone o le Wellington East Girls College. Na malaga mai ma lona aiga i Samoa ma faamautu ai ma na galue foi o se faiaoga i le Iunivesite Aoao o Samoa.
I le faagasolo mai ai o lona soifua tautua i Samoa o ia na vaaia se isi o vaega o tupulaga talavou solitulafono mai i Amerika na faamautu i Samoa mo le aoaoina o le ola toe fuataina ma o iina na ia vaaia ai lea nofoaga i Saoluafata e ta‘ua o le Better Way.
O se tamaitai e finau mo tulaga maualuga o tamaitai ma lo latou ola aoaoina ma na faalautele lana tautua i Faalapotopotoga tumaoti e pei ona ia unai ma tele folasaga na ia faia e faatatau i le ola aoaoina o tamaitai ma le ola atiae o Faalapotopotoga o tagata lautele.
O lona finau mo tamaitai ma aoaoga na vaaia ai foi lona fesootai atu i le vaega o loo unaia le tomai faatekonolosi i tamaitai (women in IT) i Samoa e pei ona galulue faatasi ai ma le Ofisa o le Pule Faatonu (Regulator).
E tele ina valaaulia lenei tamaitai i faatasiga auā le unaiga o atinae eseese i totonu o Samoa.
Ona pau le faamatalaga na maua o le itu lea na faanatinati ai Tafuamale‘afa i le falemai tele i Motootua i le faaiuga o le vaiaso ona o se fula i lona ua ma e masalomia o iina na mafua ai lona maliu peitai e lē o iai se upu aloaia ua aumaia e le falemai tele e faatatau i le mafuaaga o le maliu o lenei tamaitai.
O le afioga Tafuamase‘afa o le faletua o le sui Faipule o le Itumalo Faafaipule o Vaisigano Numera Tasi i le motu tele i Salafai le afioga Tufuga Gafoa Faitua ma e toatolu o la alo tamaitai.
O loo tālia nei la poo afea o le a faatautaia ai toe sauniga o lenei tamaitai ae o loo faaauau ona molimoli faamaisega a le toatele i le aiga o lenei tamaitai i le toesea faafuasei ai o ia.
