Poo fea lava le atunuu o loo afifio ai le paia ma le mamalu o Samoa, e lē mafai lava ona faagaloina le sailiga malo a nai o tatou tuaa ua mavae atu. Ua moni ai upu o le tusi, e susue lava le faamalama ma toe tepa i Samoa si o tatou atunuu pele.
O le aso 8 o Iuni, le Queens Birthday lea na alo atu ai le Fono Faufautua a tagata Samoa i Melepone, Vitoria, e tapenaina le faamanatuina o le Sisigafu‘a o lenei tausaga. O le Ekalesia Katoliko Samoa sa feagai ma le tapenaina o viiga o le Atua, ae o le afioga ia Patele Lolesio Te‘o, mai le afioaga o Samatau na taitaia le sauniga lotu.
Sa auai le toatele o faafeagaiga i Ekalesia e fia. O le Pulenuu (Mayor) o le pitonuu o Whitehorse lea sa fai ai le faamoemoe, le susuga ia Andrew Munroe sa fai ma malo faaaloalogia o le aso. Na mae‘a le sauniga ona momoli mai ai lea o le Tagavai a Samoa faapea foi ma le fu‘a a Ausetalia.
E viia le agalelei o le Atua ona o loo molimauina pea le toatele o le atunuu o loo mafuta atu pea i le faamanatuina o lenei aso e tāua i soo se Samoa poo fea lava le itu o le kelope o loo aumau ai, e pei foi ona vaaia le toatele o i latou na faatasi atu i le faamanatuina o le Sisigafu‘a o lenei tausaga 2015.
E toatele foi alo ma fanau o le atunuu sa faafiafia e ala i siva Samoa mo le faamatagofieina atili o faafiafiaga o le Fu‘a. Talosia ia le lumanai ia taitai i ai le soifua ma le ola o le atunuu, ina ia manatua pea le agalelei o nai o tatou mātua, ua tatou manuia ai i nei atunuu i fafo ua tatou nonofo ai.
Faamatalaga na tuuina mai
