Ou te faafeiloai atu i le suafa Manumalo o Keriso lo tatou Faaola i le mamalu ma le paia maualuga o lo tatou atunuu Samoa i soo se vaega o le kelope.
E faamalo atu le onosai ma le faapalepale i tiute ma galuega ua totofi i ai le soifua e auauna ai i le Atua i soo se taleni ma soo se faiva.
Ia alo maia, o loo tatou talatalanoa pea i le Tusi o Faaaliga. O se tusi e ese foi ona aoaoga o loo tuuina mai ai faaperofetaga pe faavaloaga foi, ae auga uma lava i le mea e tasi, o le faalauiloa lea o le faataunuuina poo le taualugaina o le finagalo o le Atua i le lalolagi.
O vaiaso e lua ua tuanai sa talanoaina ai le mataupu i faamaufaailoga. Sa fesiligia au e se tasi pe mafai ona faamalamalama atu nei mea e tau o faamaufaailoga, ma e augofie foi e fesoasoani atu i lea tulaga.
O faamaufaailoga o loo taua, o auala ia sa faaaogaina i ia ona po e momoli ai se feau faapitoa mai se tupu poo se malo agai i se tagata poo se isi malo foi.
A uma ona tusia se tusi ona saisai lea o nei tusi taai i se manoa ma faapipii loa i ai se ga‘o lea e faaaogaina i moli ga‘o e ufiufi ai tua o le tusi. O mea la na e taua o faamaufaailoga e iloa ai pe na iai se tagata na tatalaina le malelega a le tupu ma faitala i le tusitusiga.
Afai e taunuu atu le tusi ae lei tae le gao o loo ufiufi ai le tusi ona iloa lea o loo saogalemu le malelega.
I totonu o le tusi o Faaaliga, o le malelega a le Tupu o Tupu poo lona finagalo o loo fia tuuina mai i nei tusi ua uma ona faamaufaailogaina, ma e leai foi se tasi na ia tatalaina ma mafai ona silafia poo a nei mea o iai i tusi.
Peitai ua mafai nei ona tatou iloa mea o loo i totonu o nei faamaufaailoga e ala i le Faaaliga na tuuina ia Ioane.
I le faasolo atu o le tatou suesuega i le Mataupu e fitu o loo iloa ai e foliga ua iai se suiga i le tele o mea o loo tutupu i le lalolagi ae lei tatalaina le faamaufaailoga lona fitu.
O mea o loo tutupu e aofia ai le laveaiina o tagata o auauna a le Atua poo le 144,000 o tagata Isaraelu. O i latou nei e 12,000 mai ituaiga e 12 o Isaraelu. Ua vaaia e Ioane o agelu e toafa o tutu mai i itu a fa o le lalolagi ma ua latou taofi i matagi e fa o le lalolagi. Na iloa atu e Ioane se tasi o agelu ua ia te ia le faamaufaailoga a le Atua soifua, ua alu ae ai le la ma alaga atu i isi agelu ina ia aua nei o latou faaleaga i fanua ma laau ma le sami seia muai faamaufaailogaina auauna a le Atua.
E le o se taimi muamua lenei ua tatou iloa ai le faasaoina atoa e le Atua o lona nuu i le taimi a o pologa Isaraelu i Aikupito na faia ai foi e le Atua lea tulaga. Na faailogaina foi e le Atua lona nuu e ala i le toto o le tamai mamoe i faitotoa o tagata Isaraelu. (Esoto 12:13)
O le a faapea foi ona toe faasaoina e le Atua lona nuu e ala foi i le faaaogaina o agelu, e pei foi ona faaaogaina e le Atua agelu i Aikupito.
O le taimi muamua lea ua tatou iloa ai le faailogaina faapitoa e le Atua o lona nuu i totonu o le Tusi o Faaaliga. E iai le talitonuga e lei uma le finagalo o le Atua mo lona nuu e ui ina le ogatasi le futia ma le umele i le finagalo o le Atua ma lona nuu, ae sa tumau pea le finagalo o le Atua ma lona alofa mo Isaraelu, ona o le Atua ia o Feagaiga ma folafolaga. O ia na osi feagaiga ma Isaraelu e ui ina le tumau i latou i le feagaiga e pei ona aoaoina e Paulo i le Tusi o Roma mataupu e 9 e oo i le 11.
O le taimi o Puapuaga ua avea lea ma taimi e galue ai le Atua mo lona nuu ina ia toe faatulai mai tagata Isaraelu o le Nuu o le Atua e pei ona ia folafolaina mai. O le toe faaleleia ma e pei ona valoia e Sakaria 13:9 ma le Ieremia 30:5-11 atoa ai ma isi o tusi mai le Feagaiga Tuai.
Ona faafuasei foi lea ona iai le isi suiga ma ua iloa atu nei e Ioane le nofoalii o le Atua ma le Tamai Mamoe ma le anoano o tagata o loo tutu ai. O tagata mai atunuu uma, o gagana ma aiga ma nuu eseese o loo latou uuina i o latou lima lau pama ma vivii i le Atua.
O ai nei tagata ua latou vivii i le Atua? O i latou nei na omai i le taimi a o lumanai le puapuaga. Ua faasaoina i latou ma ua alagaina le manumalo ma lo latou faaeaea i le Tupu. O le lau pama o se faailoga lea o le manumalo. O le mafuaaga foi lea na alalaga ai tagata Eperu ma latou fati ane laupama a o afio atu Iesu i Ierusalema a o lumanai ona puapauaga. Sa o latou alalaga ma vivii i le afio mai o le Alo o Tavita.
O le aupaia mai soo se atunuu ma soo se gagana. O le ekalesia lea a Keriso lea na afio mai o ia e siitia. A tagai i totonu o le Tusi o Faaaliga mai le mataupu e 4 e oo atu i le 21, e leai ma se toe taua ai o le ekalesia. Ua le toe iai se ekalesia, ua latou iai nei i le nofoalii o le Atua. O i latou nei ua oofu i ofu sisina e pei ona iloa e Ioane.
Na fesili se tasi o toeaina i le lagi poo ai foi i latou ua oofu i ofu sisina, ae na tali atu i ai Ioane: “O i latou nei na omai ai le Puapuaga Tele. Ua ta foi o latou ofu ma ua faasinasinaina o latou ofu i le toto o le Tamai Mamoe.”
O le taimi tonu lea ua amata ai ona galue le Atua mo Isaraelu e toe faaleleia lona nuu atoa ma lana feagaiga ma i latou e pei ona fai mai Sakaria e 13:9: “Ou te avane lona tolu o vaega i le afi; ou te faateaese ai le eleele ia te i latou, e pei ona faateaeseina ai le eleele o le ario; ou te tofotofoina i latou, … e valaau i latou i lou igoa; o au foi, ou te tali atu ai ia te i latou; ou te fai ane, O lou nuu lava i latou; ae fai mai i latou, O le Alii o lou Atua lava o ia.”
O le toe osia lena o le feagaiga a le Atua ma lona nuu.
O le vaiaso a sau o le a tatou see atu ai i le mataupu e valu, ma o le a vaaia ai le tatalaina o le faamaufaailoga e fitu atoa ai ma le iliina o pu e fitu ma mea o le a tutupu ai.
Ia manuia lenei vaiaso i le alofa o le Atua. Ia maua pea e i tatou le latalata i le Atua a o maua le avanoa. O le taimi nei o loo tatou iai pea i le vaitau ua taua e le Tusi Paia o le Alofa Tunoa. O le vaitau o loo avea ai Keriso o lou Faaola. A oo ina faataunuuina polokalame faaiu a le Atua, e le mafai ona e toe tapa ia te ia o lou Faaola pe a maea le vaitau o le Alofa Tunoa aua o le a avea o ia ma ou Faamasino.
Soifua ona o Keriso
