E faafeiloai atu i le suafa mamalu o Keriso le Tamai Mamoe, le Alii o le Ola.
Ia alo maia o le faaauauina foi lenei o le tatou Malamalama i le Tusi Paia. O loo tatou iai pea i le Tusi o Faaaliga.
O loo tatou iai le mataupu e ono o loo faamatalaina mai ai faamaufaailoga e ono.
O le faamaufaailoga lona fa na gata mai ai le tatou suesuega i le vaiaso na tea nei, o le solofanua lona fa o le solofanua lanu samasama.
O le igoa o le o loo tietie ai o Oti ma o loo mulimuli atu Seoli ia te ia.
O le a oo atu le faaumatiaina o le tasi vae fa o le lalolagi e ala i taua, oge, faamai, atoa ai ma manu feai. O se vaega taua lenei e uiga i manu feaai. Manatua o le a toatele tagata o le a feoti.
O le maua e manu o le vao tino o tagata oti ma o le o latou faaaogaina mo a latou meaai.
Ae pei lava ona masani ai o le tele o le ai o meaola e pei o taifai i aano o manufasi o le atli ai lea ona feai.
O nei vaega uma o le a oo i le lalolagi sa faapea foi ona valoia mai e Esekielu.
“O le mea lea ua faapea ona fetalai mai ai le Alii le Atua, E le atili ai ea pe a ou tuuina atu o i ierusalema sala ogo e fa ua ia te au, o le pelu, ma le oge, ma le manu feai, ma le faamai e faaumatia ai tagata atoa ma manu. (Esekielu 14:21)
O se tulaga matautia o le a oo iai le lalolagi.
O le faamaufailoga lona lima o le oi lea ma le alaga a le au Kerisiano ua fasiotia faamaturo in totonu o le tolu ma le afa tausaga talu ona tulai mai le Anetikeriso.
O loo tupu lea mea i le lagi ma e na vaaia e ioane i lalo o le fata faitaulaga ma e faailoa mai le o i latou nein a tuuina atu faataulaga o latou soifua mo Keriso.
O le ola mo Keriso i lalo o le pule a le Anetikeriso e le o se mea faigofie.
i le taimi nei e foliga mai e faigofie le olaga Kerisiano. Atonu o nisi o le oi i le faigata ona ola ma Keriso ona o le tele o faaosoosoga. Out e talitonu e le o ni tiga ia mea pe a faatusa i le taimi o le pule saua a le anetikeriso. O le a matua faigata ona ola o se kerisiano ona o le lamatia o le soifua.
O le faamaufailoga lona ono o se matua taimi uiga ese lea i le lalolagi. O le taimi tonu lea o le amataina ai le taimi ua faaigoaina o ‘Puapuaga Tele’. E ono mea o le tutupu i le taimi e tatalaina ai le faamaufailoga lona ono.
Muamua o le a lulu mafuie. Lua o le pogisa le la ua liua e pei o le uliuli o le ie fulufulu talatala, tolu o le masina foi ua liua e pei o le toto, fa o fetu o le lagi ua pauu i le lalolagi, e pei o le mati ona toulu o ona fua moto pe a luluina e le matagi tele, lona lima o le mavae atu le lagi pei o se tusi taai ma le vaega lona ono o mauga uma ma motu o le a aveeseina i mea sa tu ai.
I se isi faaupuga o le sue atu le motu i matu o Niu Sila ua tafea i se isi vaega o le lalolagi. Masalo motu uma o Samoa ma el atu Pasefika ai o le gogoto i le moana.
O le matua avea lenei tulaga o le tupu i le lalolagi ma ala o le matua oo ai se tiga ese i le lalolagi ma i latou o loo totoe ai. Talu ai o le a tetele mafue o le le toe mafai ona tumau mauga ma laueleele o le feseetai solo e afua mai i le ogatotonu o le lalolagi.
O le feseetaiga foi lenei o le laueleele na mafua ai ona maua le sami lolo lea na aamia ai le atunu o indonesia i nai tausaga ua mavae.
E le mafai ona faatusaina lea sami lolo e tasi i le tulaga o le a oo iai le lalolagi pea oo ina tele mafue.
O le matua fetotoai tagata ma o le a oo se fefe tele i le lalolagi.
O nei tulaga uma na lapataia mai e Keriso o le a oo iai. Luka 21:11 “E iai mafuie tetele i lea mea ma lea mea, o oge foi ma faamai, ma faaiteite ma faailoga tetele mai le lagi”.
O le faamaufailoga lona on o loo faataunuuina ai valoeaga a Keriso poo ana saunoaga tuusao lava i le tulaga o le a oo iai le lalolagi.
O le a matua faaalia le pule ma le mana o le Atua i lona matautia i le taimi e tatalaina ai faamaufailoga lona ono. Fai mai le tala e ieremia “E iai ea se mea e faigata i le Atua”
Ona o le matautia o le tulaga o le aoo iai le lalolagi, e oo lava i tupu malolosi ma fitafita tele o le matua oo lava iai le fefe.
“O tupu foi o le lalolagi, , ma alii sili ma taitai o au, ma e ua tamaoaiga, ma e ua malolosi, ma pologa uma, atoa ma tama a le eleele uma o le a latou lalafi i ana ma papa o mauga.
Ua latou fai ane i mauga ma papa, “Mafuli maia ia i matou ma taumai ai matou ai le silafaga a le tietie i le nofoalii ma le toasa o le Tamai Mamoe, aua ua oo mai le aso tele o la latou toasa, o ai foi se tasi e mafai ona tu atu?
E le o le valoaga ea lenei o loo talanoa ai le perofeta o isaia o loo faapea mai ai ‘ua lafotuina le tagat nuu, ua faamaulalo foi le alii, e te le faamagaloina foi i latou.
Alu ia i totonu o le papa, ina lafi ia i le eleele, ona o le matautia o le Alii ma lona mamalu silisili’. iasaia 2:9-10 21.
O le faamaufaigloga lona o le vaega autu lea o le malamalama i le tusi o Faaaliga. A maea le faamaufailoga lona ono, ina ua mavae ese atu le lagi e pei o se tusi taai, ona amataina loa lea o le ‘Puapuaga Tele’ mo le isi tolu ma le afa tausaga.
O le periota lea o loo taua e ioelu e faapea o le ‘ou te tuuina atu foi le vavega i le lagi ma lalolagi, o le toto, ma le afi, ma le asu faaniutu, e muamua ona liua le la i le pouliuli, ma le masina i le toto, i le oo ai i le aso tele ma le silisili o le Alii. ioelu 2:30-31
O le aso tele ma le silisili o le Alii o loo faatatauina lea i puapuaga tele.
O le taimi e pogisa ai le la ma liu toto ai le masina e pei on ataua i le fuaiupu e 13 o loo iai pea le lalolagi i le Puapua. Ae taai loa le lagi ona amata loa lea o le puapuaga tele.
Samoa e, O le taimi nei o loo tatou ola pea ma outou soifua i le alofa tunoa o le Atua. O se taimi saogalemu.
O se taimi o loo tuuina mai ai le avanoa mo oe ma au ina ia maua le salamo. Peitai a oo i le taimi o puapuaga tele e pei ona taua, ona avea loa lea o se taimi sili ona faigata.
O le faailoa mai le itu saua ma le faigata o Keriso.
O le taimi taua tele lenei o loo e soifua ma ou ola ai. O le taimi lenei tatou te talia ai Keriso.
O le taimi o le salamo aua a oo ina oo mai puapauaga tele ma le toasa o el Atua, e te fiu e te toe taumafai ua leai se avanoa, e oo ina e manao ina oo mai le oti, peitai ua le mafai foi ona oo mai se oti.
Tapenaina lou soifua faaleagaga. Tapena mo aso vale. O a ni mea se tele o momoo iai e te saoloto mai.
Soifua ona o Keriso
