O loo auai nei i le Teuila o loo faagasolo nei i Samoa le au basketball e tasi mai Magele ua faaigoaina o le Auckland Bulls.
O lenei au sa faamaopoopoina e le susuga ia Tautiaga Gaina ma le susuga ia Solomona Leasi ina ua maua mai lo latou valaaulia mai Samoa i le taamilosaga Basketball o loo faagasolo ai.
O le Aso Faraile 29 o Aokuso na tuua ai Niu Sila mo Samoa ma o le faamoemoe o le susuga ia Tautiaga Gaina o ia foi lea o le Pule o le ‘au ina ia mae‘a ane lenei taamilosaga, ua o latou foi mai ma le ipu o le Siamupini mai Samoa. E 16 ‘au o loo auai i lea taamilosaga, lea e aofia ai ma le Bullz mai Magele.
Na fesiligia le susuga ia Tautiaga i le mafuaaga ua faaigoa ai le latou au, ole Bullz, peitai na ia ta‘ua e faapea, o tama uma o loo auai i le latou au, e le gata i le tinotetele, ae pei o fatu o pulu (povi) le malolosi ma le totoa o nei tama. O le lisi o le ‘au ua malaga nei mo Samoa e aofia ai, Lafaele Faga, Tiai Fuimaono, James Afitu, Pou Salea, Manuia Laulu, Fred Leasi, Rommey Leasi, Ephraim Ioane, Vaea Te‘o, Muldoon Key ma Ropati Key. O le Team Manager, Tautiaga Gaina, Assistant Manager: Solomona Leasi, Teutupe Tauaimiti, Faiaoga: Halo Tavana, Trainer: Anthony Seupule, Captain: Moa Danielson, Vice Captain: Timani Faaiu, Sponsor: Vaovasa Su‘a, o le New Era Painting Services Limited.
O faatupeina o le Malaga i Samoa, na tagi lava i lima e ala lea i suega tupe na faia i Aukilani lava.
Faamatalaga na tuuina mai.
