Faalauiloa tusitala ma tusitusiga o le Pasefika e le Shop Samoa.com

O le polokalame a le Storylines Family Days Festival, ua atoa nei le 21 tausaga talu ona faagasolo i totonu o Niu Sila atoa. O lenei faamoemoe o le faalauiloina o tusitala ma tusi faitau a tamaiti faapea ai foi ma Tusitala fou o loo fia faalauiloa a latou tusi ma galuega eseese.
O le aso 23 na amata ai lenei faalauiloa, ma sa amata mai i Dunedin faasolo mai ai i Kalaiesetete, Ueligitone ma sosoo mai ai ma Aukilani. O le Aso Toonai 30 o Aukuso sa faataunuuina ai loa lenei faamoemoe i le Vodafone Event i Manukau.

O le lua ai nei o tausaga talu ona see mai lenei polokalame ma faatinoina i le itu i Saute o Aukilani. Sa vaaia le toatele o tagata Pasefika na agai atu ma molimauina lenei faalauiloa. O se tasi o alo o le atunuu le susuga ia Rasmus Pereira, o ia lea o loo faauluulu i ai le Shop Samoa.com, o loo nafa nei ma le faalauiloina o tusitusiga ma tusitala a le Pasefika i totonu o lenei faalapotopotoga.
O le tele o tusi o loo tusia i le gagana Samoa, sa mafai ona faatuina i le Aso Toonai faatasi ai ma tusi mai isi atunuu o le Pasefika. O le Aoga Amata a Rosebank Early Childhood Centre, o loo uluaoga ai le afioga ia Afamasaga Telesia faatasi ai ma le lagolago a le susuga ia Rosetta Ioapo Iosia na latou usuina le vii o Samoa, ma le pese i le Manu Samoa. Ae o le tamaitai ia Ashley Fidow na saunia le siva Samoa ma aoao tamaiti i le faatinoina o le siva Samoa.

O nisi o kamupani sa mafai ona galulue faatasi ma le Shop Samoa.com i le Aso Toonai, o le Fabric Hutt i Manurewa le susuga ia Finau ma Kara Lologa, faapea le Little Island Press i Grey Lynn o loo tautua ai le susuga ia Evotia Tamua.

E lua aso na faagasolo ai lenei faamoemoe i Aukilani, o le Aso Toonai i le Vodafone Events Centre i Manukau ma le Aso Sa i le Aotea Centre i le city.
O le lagona faafetai o le susuga ia Rasmus Pereira i lenei polokalame ona o se avanoa ua tuuina atu ia te ia, ua mafai ai ona ia faalauiloa tusitusiga ma tusitala a le Pasefika aemaise lava ia Samoa. E tele foi se sao mo le atinaeina o le faitautusi a le fanau faapea le puipuia ma le faaolaolaina o le tatou gagana Samoa.