Ua tusia i talafaasolopito o le galuega a le Ekalesia EFKS a Kuniselani, le aso 10 o Fepuari 2015 sa tatalaina ai le isi Matagaluega ma ua lua ai nei matagaluega a le Ekalesia EFKS.
O le uluai toeaina ma mātua penisione manumalo malolo sa faavaeina mai le lotu i le 1988, o le susuga ia Rev Samuelu ma le faletua ia Tima Tu‘iai o loo maua pea lo la soifua laulelei.
E pei ona silafia e tasi le matagaluega tele sa iai, lea sa tausia e le susuga i le toeaina faatonu ia Rev Kerita ma le faletua ia Binary Reupena lea la o loo Toeaina Faatonu pea i le matagaluega o loo iai Pulega e lua.
O le Pulega a Sisifo o loo tausia e le susuga i le Toeaina Faatonu ia Rev Kerita & Binary Reupena, e 9 aulotu. O le Pulega a Matu o loo tausia e le susuga i le Toeaina ia Rev Lauie & Autalaga Lupematasila, e 7 aulotu. O le Pulega a Saute o loo tausia e le susuga i le Toeaina ia Rev Tauaaga & Senerita Mataafa, e 14 aulotu, lea la ua faavaeina ai le isi matagaluega o loo faauluulu lava ia i laua.
O le taeao manino la ma le toto‘a o le Aso Lua, aso 10 o Fepuari na auai mai ai toeaiina auā le faataunuuina o le sauniga tāua e vaeluaina ma tatalaina ai le Matagaluega fou. Sa faataunuuina lona tatalaina i le malumalu EFKS a Ipswich, le Alofa Tunoa ole Atua II, lea o loo tausia e le susuga i le Toeaina Faatonu ia Kerita ma le faletua ia Binary Reupena.
O le susuga i le toeaina ia Rev Toese Peleti Toailoa, o le Taitaifono a le Komiti o le Au Toeaina na malaga mai Sini, o ia sa lauga autu auā le tatalaina o le matagaluega fou, ma faamalosiau i matagaluega e lua. Na fai sao foi le susuga ia Rev Tavita Roma, le Sui Taitaifono o le Fono Tele a le EFKS Aoao faapea le Failautusi a le Komito o le Au Toeaina ia Rev Kerisiano Soti o i laua sa malaga mai Samoa.
Na molimauina le feofoofotai o le alofa i le misia o le mafutaga auā o lea ua manino le mata o le vai, ua maioio matagaluega e lua, e tusa ai ma le tulaga na faaiugafonoina e le Komiti o Faatonu, i le latou fonotaga ia Ianuari o le tausaga nei.
O le iuga, ia faia se isi Matagaluega e pei ona talosagaina, ma sa pasia ina ua faalua ona faafoi mai le mataupu a Kuiniselani ia Kuiniselani mai ia Me ma Aukuso 2014.
Ua pupuni vaiali ae tatala vaiola, ua utuvai magalo i seeti ona o le alofa o le Atua i le faatuputupulaia o le Ekalesia EFKS a Kuiniselani.
Na mae‘a le sauniga o le tatalaina aloaia o le matagaluega fou, ona see ane lea i le Meleniuma Hall auā foi le talisuaga ma faaaloaloga sa faatautaia e le ekalesia a le Toeaina Faatonu ia Kerita & Binary Reupena (EFKS Ipswich).
O le tiakono ia Taua Faamate sa feagai ma faaaloaloga auā le paia i toeaiina faapea mātua penisione malolo, ona tuumuli lea o le Matagaluega fou e osia sa latou lava ia taulaga faafetai ma nisi faaaloaloga i le Puna o le Olagata ma le Tiafau Hall.
O le susuga ia Rev Perelini sa fai ma fofoga o le aso i lea itu, ae o le susuga i le tiakono toeaina ia Tofua‘iofoia Lemamea sa tu tootoo auā foi faaaloaloga.
E 14 aulotu ua amata ai nei le Matagaluega Fou, lua Pulega ua iai. O le susuga i le Toeaina ia Rev Tauaaga ma le faletua ia Senerita Mataafa ua tu i matagiolo auā le Matagaluega Fou.
O le isi Pulega e 8 aulotu, ae o le toeaina faaolioli ia Rev Ionatana ma le faletua ia Alapeta Faai‘uaso, o le a tausia le isi pulega e 6 aulotu. E tusia lenei ripoti o loo loma le uluai tofiga a le Matagaluega fou i le faaiuga o le masina nei o Fepuari e maioio ai tofiga o Pulega e lua o le Matagaluega Fou.
