O le vaiaso talu ai i Ausetalia nei na maimoa ma faafofoga i ai le mamalu lautele i le talaaga o le tamaitai faafāfine (transgender) ia Jaiyah Saelua mai Amerika Samoa lea na malaga mai e faalauiloa le ata tifaga (documentary) o le ausoka a Amerika Samoa lea na lami ai Ausetalia 31-0 i le 1998.
O Jaiyah Saelua sa taalo mo Amerika Samoa i le aufili soka mai le sefulufa o ona tausaga ma o le mafuaaga lena na malaga atu ai se aupue tifaga mai Egelani e faia ai se ata tifaga.
O ia foi o se faafāfine muamua i le lalolagi ua amanaia e le FIFA poo le faalapotopotoga e pulea le soka a le lalolagi e fai ma amepasa e taulamua i le tetee atu i le faailogatagata i totonu o le soka a le lalolagi.
O le peresetene aoao o le FIFA Toleafoa Sepp Blatter na ia tusi aloaia ia Jaiyah Saelua e momoli i ai le valaaulia e avea ai o ia ma sui faapitoa e taulamua i le tetee atu i faiga taufaifai ma faatauemu i isi tagata taaalo i lenei taaloga i totonu o le lalolagi atoa.
O le masina fou e tatala ai i tua lenei ata tifaga “First Goal Wins” ma o le a maimoa ai le lalolagi i lenei alo o Samoa a o ia faamatalaina lona soifua taalo i se taaloga ua tele se sao mo ia ma lona atunuu e ui o le itu pagatia i le matatia a Ausetalia na faatuina ai.
Sa faatalatalanoa foi Jaiyah Saelua e le polokalame TV iloga a Ausetalia o le Sunrise lea e faafoeina e le alii iloga ia David Kochie ma na atagia ai le lototele o lenei alo o Samoa i lana mau e lē tatau na iai ni uiga faailogatagata i totonu o taaloga faapei o le leai o se avanoa e talia ai le faailogalanu.
“A ou taalo ou te lē alu i totonu o le malae faatasi ma lo matou ‘au o se tama poo se teine, ou te alu i totonu o le matou au i taimi o taaloga o se tagata taalo o le soka.” Sa ia faafetaia foi Tim Cahill mo le lagolagoina o lenei ata tifaga o Amerika Samoa “First Goal Wins” i le taimi na faalauiloa ai i Amerika.
Ua toatele i latou e viia le tulaga o Jaiyah i lenei mataupu ma ua fai ma faamalosiau i le toatele o loo feagai ma nei faafitauli i totonu o soo se taaloga ma afaina ai a latou taaalo ma tapenaga faalemafaufau.
O nisi lava e pule ai i o latou soifua pe a malosi tele le faifai atu ma faapalopalo e tagata lē magafagafa. O Jaiyah o lona igoa na faaigoa ai ina ua fanau mai o Jonathan a o lenei ua avea nei ma amepasa i lona igoa o Jaiyah Saelua.
