Poo fea lava e tautaua ai se Samoa ma lauiloa si o tatou atunuu ona o taumafaiga ma faagatama e auai ai alo ma fanau, e lē taumate le loto faagaeetia ma le loimata maligi o le fiafia ona ua tau lau o le faamoemoe ma faapea ifo, E! ta fia Falealili fua.
E silia ma le 30 atunuu eseese o le lalolagi na auai sui tauva i le tauvaga siisii uamea mamafa i le sii malosi poo le Powerlifting na faia lea i Johannesburg Aferika i Saute i le faaiuga o le vaiaso na se‘i mavae, na mau tulaga ai le ‘au siisii a Samoa na malaga e auai i lea sailiga siamupini o le lalolagi.
E toatolu i latou na auai e fai ma sui o Samoa, e aofia ai le tamaitai o Matile Sitagata, Tavita Lipine ma Oliva Tamatoa Kirisome. E ui i le faigata o le tauvaga ma e lei faigofie le fesagai ma sauai o le lalolagi pe a faatusa atu i tino maualuluga ma le malolosi o sui tauva mai isi atunuuu tetele, peitai e lei tuu mamaina foi e le malo o le talo ma le popo le sii malele faalaupepa o uamea mamafa e le tatou ‘au, ua agiagia ai le tagavai o Samoa i totonu o Aferika, a o silamio atunuu o le lalolagi na auai.
Ai o le mea tonu lea e ta‘ua o le taalo faatamalii, faatausala, alu iai ma le malosi e leai se fefe, fai ia mafai ia maua se ‘ai mo Samoa, a lea la ua tino mai.
O le tamaitai o Matile Sitagata na muamua taalo ma na tauva i le vaega laiti 84+kg, lea ua toe avea ma siamupini o le lalolagi i le mae‘a ai o le tauvaga i Aferika, ua lua ai nei tausaga sosoo o avea pea o ia ma tamaitai malosi i le powerlifting i tauvaga o le lalolagi. Na ia maua pine e fā i le tuufaatasiga, tolu pine auro, tasi le pine apamemea.
E tasi le pine auro mai le sii malosi (deadlift), o le sii o le squat faapea ma le pine auro o le tulaga muamua i le lalolagi ma le tasi le pine apamemea mai le sii taoto poo le bench press. O le susuga Tavita Lipine o le sui pito i matua foi lea o le ‘au masii a Samoa, na faamoemoe e tauva mo le vaega matutua ona o loo ia umia foi nisi tulaga maualuluga i tauvaga a le lalolagi talu ona sii mai, peitai e lei faataunuuina lona faamoemoe ina ua faaleaogaina lana taumafaiga ona ua le ogatasi aiaiga o le taaloga ma le togiga taalo sa ia faaaogāina, o lea na faasee tuagalu ai le susuga a Lipine, ma lē faaauauina ai lona taumafai.
Ae ui i lea, e lei avea ia faafitauli e faavaivaia ai le taumafai a si a tatou ‘au, a o faasauni le alii o Oliva Kirisome e taalo, auā o ia lea sa taualuga i ai le ‘autaalo a Samoa sa mulimuli sii ma tapunia aloaia ai ma le sailiga siamupini o le lalolagi. O le vaega sinia i le mamafa 120+kg lea na tauva ai Kirisome.
O se tasi nei o tamafanau a Samoa, ua faasolo i luga le maoae o le tulaga ua ia ausia, pe a faatusa atu i tagata siisii o le lalolagi na tauva ua leva i le taaloga, aemaise o ia e pito i laititi ai lava i lana aupaga.
E maea le tauvaga tasi le pine auro ina ua manumalo i le sii o le deadlift, tasi le pine siliva ina ua tulaga lua i le lalolagi i le faatulagaga o tagata siisii i lona aotelega, tasi le pine apamemea i le sii o le squat. E ui ina itiiti ma faatauvaa Samoa o se atunuu e tau le iloa i le faafanua, a o lea ua gagana ai le lalolagi ina ua agiagia lona tagavai ma usuina le vii o le fu‘a o le saolotoga o si o tatou atunuu ona o taumafaiga a nei alo ma fanau Samoa i le faaiuga o le vaiaso.
O le fesili taumate, faamata o le a silasila loa Samoa e faatāua le siisii uamea mamafa ma faatupe pei ona faatupe le Manu Samoa ma isi taaloga, a o se lumanai manuia mo nai tagata taaalo? E tele nisi o tauvaga faavaomalo o loo loma nei, o le a tapena malaga i ai le ‘au siisii e aofia ai le tauvaga i Ausetalia ia Novema i le faaiuga o le tausaga nei.
