O se vaaiga lena i le faamoemoe ole aiga ma e na tutupu mai le tina ia SIMA MAUI’A i Saleaaumua ma Lalomanu i Aleipata. Sa fa’amaopopoina e se tasi o le fanau a le tina ia Sima ma o le uii foi lea o le fanau, Talavale Maalo Aumua o loo soifua mai nei ma alala i Sini Ausetalia.
O se feiloaiga matagofie ma le fiafia ua mafuta ai alo ma fanau na tutupu mai i lenei tina. O lenei faatasiga sa faia lea I le Sydney Gateway Lodge Resort i Sini Ausetalia i le aso 27 Tesema – 30 Tesema 2012.
Sa amataina lenei faatasigai i se lotu faafetai ile Atua ona ua mafai ona faataunuuina ma le manuia le faamoemoe.
Sa taitaia lenei sauniga e se tasi o lupe faalele a le aiga, susuga Fa’aesea Filoa, ona faagasolo ai lea ole polokalame mo aso e fa i totonu ole Resort. Sa faatautaia lava e alo talavou o lenei aiga le polokalame mo le faatasiga.
Sa sosoo ai ma le po mo le autalavou (Youth Night) e faasoa mai ai le tupulaga i se faamanuiaga a le Atua i o latou olaga aemaise le aiga atoa.
O se taleni musika a lenei aiga e afua mai i lei tina ua faamanuia uma ai alo ma fanau o le aiga. Fa’afoi le viiga ile Atua ona o ana faamanuiaga. Sa faia taaloga ile va o au e lua sa tufatufaina iai, o le Tigers ma le Team Awesome.
O se vaaiga matagofie ona ole fiafia uma o tagata, e amata mai lava i e matutua seia oo ile fanau iti. Sosoo ai ma le po fiafia (Fiafia Night) e faaali ai items a le fanau ma faaali ai ata poo (slideshows) a le aiga ma tufaina ai le tusi ole gafa ia malamalama le aiga aemaise alo ma fanau i le mea na tutupu mai ai o latou tuaa.
Faauma ma tapunia aloaia le mafutaga ile pese faamavae a le Malaga mai Aukilani Niu Sila na fatuina mo le tama ia Talavale Maalo ma le tina ia Maopulu ona o lo laua manatunatu ile faamaopopoina o fanau ia ola fealofani ma mafuta fiafia.
Na tuumuli le mafutaga ma tapena atu i se tasi o aso faapitoa ole fanau ua faauuina mai le aoga Faith Bible College I Tauranga ua tuufatasia ai i laua i le sakalameta ole faaipoipoga.
O le alo e faasino ile tama ia Talavale & Maopulu, o Jason Aumua ma le tamaitai o Kate. O se faatasiga fiafia ma le manaia i lo matou aiga ona e le gata ile reunion ae ole faaipoipoga a le fanau.
Na faaauau le mafutaga ile maota o le tama i Campletown Sini seia oo ile Aso 06 Ianuari 2013 ona lulu lima lea ma faatofa.
O le faamoemoe o lenei faatasiga ole a toe faia i le tausaga 2014 i Niu Sila aua e lei auai uma mai le toatele o loo alala i Amerika, Amerika Samoa, Ausetalia, Niu Sila ma Samoa.
Faamanuia le Atua i fanau a lenei tina o Sima Maui’a o alala i itu e fia o lenei lalolagi. Talosia i le alofa o le Atua ia tatou aulia atu le faamoemoe ua atofaina ile 2 tausaga o lumanai nei.
