O upu e masani ai le atunuu o le fuata ma lona lou, o lona uiga o le aso ma lona suiga e pei o le fuaitau a le Tusi Paia o le vaitau ma mea e tutupu ai.
E faapena le tulaga o loo iai le taaviliga o le soifuaga i tulaga tau faafiafia e pei o pesepesega i lipine o loo fiafia ai le toatele e faafofoga iai, ia po o ata tifaga foi o loo fai ma vaisu i lenei foi vaitau.
O le ofi atu o Samoa i tulaga e pei ona pueina ai ata tifaga ma tuufaatasia i luga o dvd, ose atinae ua molimauina le saosaoa o lona faatupulaia.
Ose itu lelei tele mo tagata Samoa aua e le gata ina maua ai tupe mo i latou o loo tuufaatasia nei ata, ae ua mafai foi ona siitia ai Samoa i se isi tulaga maualuga o agavaa i nei foi vaega tau faafiafia.
O le ofi mai o ata tifaga o loo pueina i o tatou lava vaifanua, ose faasalalauga pito sili lea ona televave mo Samoa aua le maimoa mai o isi foi atunuu i le aave atu o ata o le lanulauava o Samoa ma ona atufalega.
E le gata i lea, ae ose itu lelei tele le faaaogaina lea o le tatou lava gagana, ua atili fesoasoani ai i alo ma fanau laiti i le tapueina ma le aoaoina o le tatou gagana ma faaaogaina e tautatala ai i aso faisoo.
Na faaalia e se tasi o tamalii ua loa lana tautua i le atunuu i tulaga tau faafiafia e ala lea i pesepesega le susuga Vili Leilua Ieru, ose agaga fiafia ona ua mafai ona laa Samoa i lenei foi taleni.
O meaalofa uma lava mai le Atua mo soo se tasi, ae ona ua pau lava foi e lei tau iai mafaufau o tagata Samoa i le tele o tausaga ua tuanai na mafua ai ona faatuai ona oo i lea foi matata o le fai ata tifaga.
Na faaalia e Vili, masalo foi sa tele ina tau iai mafaufau o nisi peitai o le utiuti o mea e faaaogaina e tuufaatasia ai ata tifaga o se tasi lea o faapogai.
Na ia saunoa, e to lona pulou ile toatele o tamalii ma faalapotopotoga ua mafai ona tuufaatasia ni ata tifaga ma faatau atu i le atunuu.
O lona foi lea faanaunautaiga, ia faapea ona toatele nisi e tulai mai i lea foi taleni aua ua faigofie i nei aso ona maua masini ma le tomai e faatino ai le tele o ata tifaga.
Na ia saunoa foi, ua sili lea ua maua ata e silasila iai tama ma tina matutua e malamalama lelei i le tatou lava gagana, nai lo le tele o isi ata tifaga e fai o le uumi, ae le faasamoa toe le faaperetania ae fiafia lava iai tagata matutua.
Peitai o le ofi mai o ata Samoa, e le gata e mitamita ai le loto o le toeaina ma le loomatua aua o loo pueina i laufanua o Samoa, ae o loo faapea ona malamalama lelei i le feau o loo taumafai le ata e momoli mai ona o loo pueina i la tatou lava gagana.
O le aso ananafi sa faapea ona faatoa faatauina atu ai i tua se tasi o ata fou ua faaigoaina “Ta lelava Pologa”. O se tasi o ata mataina e faatatau i se tama ma lona atalii, peitai na maliu lenei tama ao laititi si ona atalii.
O le uso o lenei tama sa faapea ona ia tausia le atalii, peitai ane sa ia faia e pei ose pologa ae le ose atalii.
O le ata lenei o le “Ta lelava Pologa” ose ata o loo momoli mai ai se feau taua tele i le galuega faamatua e ao ona toe sasaa le fafao ma silasila totoa iai, aua e tatau ona tutusa lelei le tausi e tausi ai lou atalii moni ma le atalii o lou uso, poo le tama foi a lou tuafafine, aua o a latou fanau o lau fanau moni foi lea.
O se ata faanoanoa ma le faamomoi loto peitai na iu i sona taunuuga matagofie. O lea ata o loo faapea foi ona faatauina atu i le faleoloa a le susuga Vili Leilua Ieru i le numera 2 Mason Avenue, i Otahuhu.
O loo faapea foi ona faatauina ai ma le vaega lua o le ata ua taua o le “Soifuaga Pumoomoo” o le ata e uiga i nai tamalii Samoa e po le latou vaai, peitai ua avea le latou taleni pese ma ala e saili ai tupe e ola ai i lea aso ma lea aso. O se ata malie tele, ma e aoga foi mo maimoaga a le aiga atoa.
