E ui ina toia le aulotu i le mafui‘e ma faaleagaina nisi o totoga o le falesa tapuai ma le tuamaota, peitai na faatumuina pea lea gaogao e le Alii o le va ma tulai mai se aulotu e lei solomuli, ma faatatauina ai se latou taumafataga fiafia mo le Kirisimasi mo aiga uma ma tatala foi le avanoa mo soo se tasi e fia ulufale.
Na faataunuuina le faamoemoe i laufanua o le ekalesia i Leyden lea o loo tausia e le susuga Pstr Moega Lasei ma le faletua o Mara i le aoauli o le Aso Toonai 10 Tesema, o se ripoti mai le sui o le Samoa Times, Pio Liaina i le toatele o le mamalu na auai aemaise uso palagi, matagofie le tapenaga faaletino saunia aemaise o le laufofoga fiafia o le faifeau ma lona faletua ma le aulotu atoa.
E tele mafatiaga o le mafui‘e sa afaina ai mea totino a le aulotu, faaletonu foi nisi o aiga ae sa taumafai malosi e lalago faatasi i taimi o faigata, ma faafetaia le alofa o le Atua e lei iai se soifua ua maimau o le aulotu.
E molimauina foi le agaga fesoasoani o le latou auaunaga e ala i le sailigatupe mo ē ua mafatia i Aferika, ma tuuina atu le latou foai e ui i ni mafatiaga sa oia ai le aulotu. O se tasi o tautua ofoina e le susuga Moega ma Mara Lasei ma le nofo a alo, sa latou tapenaina ma gasese se taumafataga mo le aufaigaluega faifale lea na malaga i Samoa mo se vaitaimi umi e fausia fale na faaleagaina i le sunami, e faafetaia ai le fitaituga o nei alii papalagi na malaga mai Kalaiesetete.
Peitai o le ‘aiga faapitoa lenei e faafetaia ai le alofa o le Atua, aemaise ua iite fanua-a-lalo o le faatalitali atu i le afio mai o le sa o le Alii o aiga, ma mafuta fiafia aiga uma o le aulotu, e ao ai ona tepa i tua ma le loto faafetai ae savali i luma ma le loto faatuatua.
Ia manuia le Kirisimasi ma le Tausaga Fou.
