O le a ou faaaogāina ni mea na tutupu mai i o tatou tagata i le vaiaso nei, i luga o le tulafono, ua ala ai ona ou faia le fautuaga lea e ta‘ua i luga.
Sa valaauina sa‘u fesoasoani e se tina ma lona alo ona ua tetei ua tutu atu leoleo na telefoni e le latou neighbours. O neighbours o papalagi.
O se mataupu ua leva ona feagai ma lenei tina e uiga i le tuaoi ma le auala na fai e le Council e aiā tutusa i ai le tina Samoa lea ma lona neighbour papalagi. Sa ou oo atu o iai leoleo.
Sa ou aveina loa i leoleo la‘u card loia. Sa mulimuli atu leoleo e toalua i o‘u tua a o o‘u alu i le fale o le tina ma lana tama.
O le mea tāua lenei e nofouta i ai. Fai mai le leoleo i le tina: “tali mai a‘u fesili, e tāua lou tautala mai i le matou suesuega faaleoleo ona o lea matou te fia malamalama i le mea na tupu”. Sa ou taofi le tina e aua le tali i le leoleo.
Lapataiga: Aua le vave le tala i leoleo. Malosi tele Samoa i le fai o faamatalaga ma le lē malamalama ae iu ane ua falepuipui, talu ai le faatamala.
A suesue loa e se leoleo, tasi lava lau tali lea: “Ou te Manaomia se Loia faamolemole faato‘ā ou tautala atu lea; e iai la‘u aiā e valaau ai sa‘u loia i le tulafono o le Bill of Rights”
Employment Matter: O se mataupu na tupu mai i se fale faigaluega:
Sa sulu mai se Samoa i se fesoasoani vave ona ua foliga mai o le a tuli ma lana galuega ona o se moliaga. O lenei galuega ua ova atu i le 10 ma ona tupu tausaga o faigaluega lenei Samoa i le fale falefaigaluega lea.
Sa talosaga mai ou te auai i le taimi o le a suesue ai ia e le kamupani. Sa ou alu i le fale faigaluega e pei ona talosaga mai.
Sa ou fia puipui le galuega a lea tagata ua tele tausaga i te‘i ua tuli. Sa aogā lo‘u iai, ona sa ou faasa‘oina ni fesili lē sa‘o a le kamupani na fai i le Samoa.
Sa ou fautuaina foi la‘u client Samoa i upu e nofouta i ai, ma upu e tatau ona tautala ai, ma aua le tautala pe a lē malamalama.
O lea ua toe foi i le galuega le Samoa na ou tu ai. Talofa, sa iai ma se isi Samoa ua tuli ma le galuega, ona sa taumafai lava ia, ae leai se isi na fesoasoani, e leai se loia na fesoasoani i ai.
E tasi le moliaga sa faamalolo ai le Samoa na ou tuai. Ae oo atu i luma o le kamupani, ua lautele moliaga. Sa ou faaaogā le taleni loia i le taimi lea sa ou tausisi lava ma faamanatu i le kamupani, e tasi lava le moliaga lea na ma o atu e fai i ai le tala a la‘u client.
Sa ou talosaga i le pule o le kamupani, e tatau ona ave atu le tagata na faia le tala tautuuai e fai sana faamatalaga i o‘u luma ma luma o la‘u client ma sui o le kamupani.
Sa ala ona ou faia lea talosaga, auā e tele tupe e lau pe a uma le fono, fai ai finauga tusitusia.
O lea talosaga na ta‘u atu ai i le kamupani, e lē faatafa a‘u ma le Samoa lea ou te tu ai.
Na fai le faaiuga i le taeao lava lea, e lē faamaonia le tuuaiga i le Samoa lea na ou tu ai. O lea ua toe foi i le galuega.
O se isi lapataiga lenei. Sa vili mai le Samoa lenei ma fai mai ia te au se‘i uma le fono ma le kamupani ona sau lea e vaai a‘u.
O la‘u tala, aua le toe sau e vaai a‘u pe a uma le fono, e sue se isi loia e alu i ai, auā ou te lē o toe faia ni galuega mo se isi, e muamua tuli sese, ae mulimuli sau e vaai le loia.
Atonu o lea ua talitonu le Samoa lea i le ala na ou tausisi ai ou te iai i le fono muamua. O lea ua uu lana galuega. E sili le puipuia i le lo le togafitia.
Fautuaga:
Ua faigata tele ona maua ni galuega lelei i nei aso. Uu lau galuega ua leva ona e faigaluega ai, auā le lumanai o oe ma lou aiga. E totogi loia e fesoasoani, ae a leai sau galuega, pe a tuli oe i se tuuaiga sese, e telē le afaina o oe ma le aiga.
E aogā tele le iai o lau loia i le taimi muamua a o lei faamaonia le moliaga o oe e le fale faigaluega.
E leaga le tuli o oe faato‘ā e alu loa e saili se loia.
