Ua talafeauga lelei lava le amataga o suega faaiu o lenei tausaga ma le faaaogā o se maota tele a le aoga i Safata lea na fausia ma tatala aloaia i le faaiuga o le vaiaso na tea nei. O lenei galuega e $79,000 (tala Samoa) lona tau atoa.
O se fesoasoani na talosaga i ai le komiti a le aoga i lea itumalo, ona o le faaleaga ai o le fale sa faamautu i ai le aoga i ana sauniga lotu ma isi faatasiga poo le hall ona o le afā o Eveni i le faaiuga o le tausaga na tea nei.
O le tali na aumai i le Polokalame fesoasoani mo Faalapotopotoga lautele le CSSP ma faapea ona aumai ai le tinoitupe e $71,000. O le sao o le faalapotopotoga a mātua ma faiaoga le PTA na maua ai le tinoitupe e $8,000 tala Samoa. Sa tuufaatasi lenei tupe ma fausia ai loa le maota o le aoga lea ua faapaiaina.
O le faletua o le tausi matagaluega ia Tauato Faavevela na ia tatala aloaia lenei aoga i se sauniga lotu o le faafetai i le mafai ona tino mai o lenei faamoemoe.
O le faalua ai lea ona talosagaina e lenei aoga lea Faalapotopotoga ma tali mai. E pei ona ta‘ua e le peresetene o le Asosi o mātua ma Faiaoga le susuga ia Mamea Saimasi Suataga.
O lenei la galuega tele o le a faaaogāina e fanau ia latou suega faapea ai foi ma le laugatogi o lenei tausaga. E latalata i le to‘a 400 alo o loo aoaoina i lenei aoga ma e 6 vaiaso na fausia ai lenei galuega.
O le faaaliga a le alii o Kolose Fruean, o le sui lea o le CSSP sa iai i le tatalaga o lenei faamoemoe. Ua tele fesoasoani ua tuuina atu i afioaga i totonu o Samoa ina ia mafai ona atinae ai ma o se tasi lenei o faataitaiga o talosaga ua talia e le faalapotopotoga.
E amata mai lava fesoasoani i tane vai, o nisi o upega fagota mo atina‘e mo tupulaga talavou ae ua feololo lava foi nuu ua talosaga atu mo maota lava faapea e mafai ona tuufaatasia ai mafutaga a aulotu, o nuu faapea ai ma aoga. E lē fausia e le CSSP ni faleaoga ae o maota faapenei e pei o le hall lea ua mae‘a e mafai ona agai i ai le faalapotopotoga fesoasoani lenei mo le faatinoga.
O le CSSP ua faapea ona faatupe e le Iuni a Europa atoa ai ma le Malo o Ausetalia, ma o le faamoemoe ina ia agai sa‘o lava fesoasoani nei sa masani ona faaauala mai i ofisa o nei malo i totonu o Samoa poo le malo foi o Samoa, ae ua lua nei tausga talu ona sui lenei faiga ma ua vaaia le vave ona faatino o fesoasoani ua tapa e afioaga mo le faatinoga o atinae i soo se itu.
E pei lava o isi fesoasoani sa faapea ona faaui mai i le Malo o Samoa i tausaga ua tuanai o loo iai lava ma le manaoga ina ia iai se sao o i latou e talosaga, lea la na iai le $8,000 lea na faapea ona faaopoopo i le tau atoa o lenei galuega e pei ona saili e Mātua ma Faiaoga, le PTA.
