O le sailia o se tausala o Samoa i Niu Sila, le Miss Samoa New Zealand i lenei tausaga 2013, sa agai ma faatāua ai le ‘au‘au, o “Measina o Samoa”.
O le afiafi o le Aso Toonai talu ai, aso 9 Novema, sa tumutumu atu ai le mamalu o le atunuu i le aai matagofie o Hamilton, i le nofoaga tele i Clerance Theatre i Hamilitone, ona o le fia molimauina lenei faamoemoe tāua i soo se tamaitai Samoa, ma fia molimauina foi tapenapenaga a tamaitai lalelei sa sailia i ai se Tausala o Samoa i Niu Sila i lenei tausaga.
Ona o nisi o tuatuagia lē ma‘alofia i le taimi mulimuli, na lē mafai ai ona faaauauina tapenaga a nai isi tamaitai sa muai sii aao e fia auai, ae peitai sa lei toe tuta‘ia ai le faagasologa ua mae‘a ona faamautuina o sauniuiga o lenei polokalame matagofie. Ma e toatolu tamaitai talavou sa faia i ai le sailiga o se Tausala Samoa i lenei tausaga.
O le tamaitai tauva muamua, o Brooke Lepou-Evaga (Miss Apia Bottling Co. Ltd), tamaitai tauva lona lua, o Sili‘a Aolele (Miss Yoyo Entertainment), ae o le tamaitai tauva lona tolu, o Margaret Sarona Scott (Miss JANEANDLISA).
E ui ina na o le toatolu tamaitai sa tauva, ae sa lei faigofie foi le galuega a faamasino, ona na molimau i latou uma sa auai, e taufai lalelei uma tamaitai i o latou fuaitino ma foliga lalelei, ae sa lei alo tamala foi i latou uma i le faatinoga o a latou taleni, o latou laei sa faia i ai le faamasinoga, ma le aotelega atoa lava o gaioiga uma a tamaitai taitoatasi a o faagasolo le tauvaga i lea afiafi.
Ua misia e le mamalu o Samoa i le motu i Matu o Aukilani le avanoa e maimoaina ai lenei tauvaga i laufanua o Aukilani e pei ona sa masani mai ai tausaga ua tea, ae faafetaia ai foi le tamaitai faatonu, Teeva Matafai, ma le komiti faafoe a le Miss Samoa NZ i lenei tausaga, ona ua a‘e se finagalo ma amanaia foi le lagolago mai o nai o tatou tagata i lea foi faaitu o le atunuu, ma ua tau tuutuu atu teisi ai le tauvaga e faia i lea pito o Niu Sila, ina ia faamalieina ai foi le naunau mai o nai tagata Samoa i lea pito, ae se‘i malaga mamao tasi foi Aukilani latou.
O le iuga o le tauvaga, na manumalo le tamaitai tauva lona tolu, o Margaret Sarona Scott. O Margaret foi sa manumalo i le vaega o taleni, ina ua matuā faateia faamasino ma le aofia uma sa auai, i le matagofie o le siufofoga o Margaret a o usuina lana pese Samoa, aemaise foi le matala lelei ma le manino o lona usuina o le pese Samoa, e ui lava o se tamaitai afakasi, e Samoa lona tina, ae o lona tamā o se palagi mao‘i.
Na ave foi e Margaret faailoga mo le Puletasi sili ona matagofie, ma tulaga muamua foi i le Interview poo le faatalanoaga. O isi faailoga e pei o le Laei Faaleaganuu e sili ona matagofie, na maua e le tamaitai o Brooke Lepou-Evaga, ae o le Laei taele e sili ona matagofie na manumalo ai Sili‘a Aolele.
O le tamaitai faasalalau a le ia Yolande Ah Chong o le Radio 531pi, sa fai ma Fofoga poo le MC o lena afiafi, ae o le laulau o faamasino sa iai le tamaitai loia, o lē foi sa avea ma Miss Samoa New Zealand i le 2006, Josephine Fuimaono-Sapolu, le faatonu o le SUGA maganize, Cecilia Sagote, le tamaitai o Charlene Tedrow, ma le alii faasalalau o le Radio 531pi.
O le afiafi mulimuli foi lea o le pale o le Miss Samoa NZ sa tauaveina mai e le tamaitai lalelei o Penina Paeu mai le tausaga 2012, lea na ia faaee atu i le tamaitai ua manumalo nei. Peitai o loo tauave pea e Penina le pale o le Miss Samoa mo le Miss World, seia oo i le taimi o le a faatino ai foi lea tauvaga, ma faapale ai se isi o le a tulai mai.
Iuga o le Tauvaga mo le Sailia o le Tausala Samoa NZ:
• Best Traditional Wear –
Brooke (Miss Apia Bottling Co. Ltd)
• Best Sarong –
Sili‘a Aolele (Miss Yoyo Entertainment)
• Best Talent – Margaret Sarona Scott
(Miss JANEANDLISA)
• Best Interview – Margaret Sarona Scott
(Miss JANEANDLISA)
• Best Puletasi – Margaret Sarona Scott
(Miss JANEANDLISA)
• 2nd Runner Up: Brooke
(Miss Apia Bottling Co. Ltd)
• 1st Runner Up: Sili‘a Aolele
( Miss Yoyo Entertainment)
• WINNER: Margaret Sarona Scott
(Miss JANEANDLISA)