Mae‘a le Challenge Lona Lua a le 20s Club

E faatoluina le fuainumera o sui na faaulu mai i le fia auai ma fia tauva i le polokalame a le kalapu 20 mai le aso 4 o Iuni seia oo mai i le aso 9 o Aukuso, lea na faamutaina ai ma faia ai loa le laugatogi (prize-giving). Mai le 26 na tauva i le polokalame muamua, e 72 na faatinoina le challenge lea ua faatoa mae‘a nei.
Ona o lea fuainumera tele, na tuu vaega (division) ai loa le tauvaga mo le faafaigofie ona faamaumau ma faamaopoopo le faagasologa o le toesea ma le faaitiitia o pasene o le mamafa, o le ga‘o aemaise o le me‘i o le sulugatiti i totonu o le 10 vaiaso.
E tolu lava aso o le vaiaso e fai ai toleniga i le faaaogāina lea o faiaoga faapitoa e faatino i le Zumba e susuga ia Tali, Mesepi, Joe Kennar, Daniel Kennar, Elijah Kennar ma le faatamā ia Salu Salu mai i le 6 i le 7 i le taeao o Aso Lua, Aso Tofi ma le Aso Toonai ia aemaise foi o isi aso e tuu lava i le faitalia o le sui latou e faaaogā ai isi auala e mafai ai ona ausia manaoga o le tauvaga.
E tolu vaega na faavasega i ai sui mo le tauvaga, o le Division 1 o le tupulaga talavou mai i le 25 tausaga agai i lalo, o le Division 2 o le autalavou malolosi mai le 25 tausaga i le 55 tausaga, ma le Division 3 o le au golden seniors o i latou nei mai le 55 tausaga i luga.
E tele lava ni vaega lelei ma le matagofie o lenei polokalame. O le faamoemoe tele o lenei mafutaga, o le faaa‘oa‘o, faailoa ma faamautu le silafia e tagata lautele ona tausisia auala e mafai ai ona fesoasoani i le faaitiitia o le tino lapoa ma le mamafa ae maise foi o le tausiga o le itu tau meaai e tatau ma paleni lelei mo le tino ma o lea la ua ma’ea nei foi le challenge lona lua.
O le Division 1 na manumalo ai le tamaitai o Iliganoa Michelle Faamausili ma na mauaina ai le faailoga tupe e $600 ma le tamaitai o Alofaaga Lua na manumalo i le lusiina po o le faaitiitia o senitimita o le sulugatiti.
Division 2 na manumalo ai le susuga ia Lui Kolio ma lana faailoga tupe e $1,000 ma le tina ia Tilomai Kolio na ia mauaina le faaitiitia o senitimita o le sulugatiti ma le Division 3 na manumalo ai le tina ia Mauga Feagaiga ma na mauaina ai le faailoga tupe e $600.00 ma le tina ia Palolo Salu na ia maua le faaitiitia o senitimita o le sulugatiti.
O lenei polokalame e taitaia ma lagolagoina malosi tele e le susuga ia Amosa Kennar ma lona faletua ia Sera Kennar. E fesoasoani tele le faatinoga o lenei challenge i le vai o le Herbal Life mai le Marvellous Nutrition Company. Ia e momoli le faamalo i sui uma na taufetuli i lenei tauvaga.