Filifili Gwen Swann i le aufili Netipolo a NSW

O se tasi lenei o miti a mātua e unaia ai le finafinau a le fanau i aoga ma taaloga. O le filifilia la o le tamaitai o Gwen Swann e sefululua ona tausaga i le aufili netipolo a Niu Sau Uelese o se mitamitaga i lona tina ia Merita Swann ma nai ona mātua le susuga ia Farani Swann ma le faletua ia Faafeao Swann.
O le tamaitai ia Gwen na piki mai mo le aufili a Niu Sau Uelese mai lana kalapu a Sydney East lea e taalo a i Sutherland.
O le masina fou o le a alo atu ai mo se avanoa e ono filifilia ai mo le aufili a Ausetalia i lalo o le sefululua tausaga. E telē se avanoa e ono manuia ai lana taumafai auā e matauina le agavaa o ia i le tele o tulaga i totonu o le ‘au.
O lona auai ai i lenei aufili a le Setete e moomia ai foi le malaga faatasi ma nai ona mātua i isi itumalo mo le tapuaiga. Sa faapea ona fai e nai ona mātua ma aiga se sailiga seleni e auala atu i taumafataga o Sapa na faatauina i se tasi o Aso Toonai auā se fesoasoani.
Na manuia lea faamoemoe ma malaga atu ai mātua auā le lagolagoina o taaloga a le fanau. O le alaleo a le Fofoga Moomia i Sini nei FM98.5 lea e faasalalau ai Farani Swann, Mano Pesefea, Tupuola Faavae ma Opi Toomalatai, na faaleo ai se faafetai tele a le tamā o le aiga ia Samoa i Sini nei ma lana tapuaiga aemaise le lagolagoina o Gwen Swann.
O le susga ia Farani o ona afioaga o Apia, Vailima, Lepa ma Taga i Savaii a o le faletua ia Faafeao Swann o ona nuu e aofia ai Matanofo i Falelatai, Salelavalu ma Saanapu.
O lloo auai atu i le Ekalesia LDS poo le Ekalesia o le Au Paia o Aso e Gata Ai i Punchbowl lea e auauna ai le susuga ia Epikopo Mose Afualo ma le faletua ia Siua.