O loo vevela pea Taaloga a le Taupulega i Initia e pei ona tulimataia nei e le lalolagi e ala i maimoaga i le Televise. Peitai o le aso lona 6 o taaloga, o le Aso Toonai na faato‘ā mavae atu nei, ae ua amata ona tosotoso a‘e i luga ma agiagia le Tagavai o si o tatou atunuu pele o Samoa, le atunuu e tau lē iloa i le lalolagi ae ua avea lava mea nei o Faagatama ma ala o le talanoa solo ai o soo se tagata o le lalolagi ia Samoa.
O le agiagia o le Fua o Samoa i Initia i le po o le Aso Toonai, o le uluai Pine Auro a Samoa mai le taaloga Siisii Uamea Mamafa, mai le susuga a Faavae Faauliulli i le vaega o alii i le 94kg, i le Fale Taalo o le Jawaharlal Nehru Sports Complex.
Sa iai lava faamoemoega o Samoa a o sauni lana ‘au mo nei taaloga, e maua a latou pine i le Taaloga lenei o le Siisii Uamea Mamafa, ona o le au Opeloge ua logologoā ai, ma e iai foi nisi o matatia sa o latou faamauina mai taaloga ua mavae.
Peitai o le alii o Faavae Faauliuli o le taimi muamua lea ua malaga ai e tauave i le igoa o Samoa ae o lea ua silamiō le lalolagi ina ua ia faatietie Samoa i le maa salafa.
O le sii mulimuli lava a le alii o Faavae na manumalo ai e 192kg ma sili atu ai i le alii Sikotilani ma le Nigeria na o latou tauva, lea na o la maua le Siliva ma le Apamemea. O le alii o Nick Roberts mai Canada lea na favour pe na mate uma i ai i le au paga lea ona o lona malosi, peitai na lei tuumamaina e tamaiti o le Manu ma malo ai Samoa i le Pine Auro, ua lua ai nei la Pine a Samoa i le Auro a le alii o Faavae ma le Pine Apamemea a le tamaitai o Masele i le taaloga o le Togi Pulu Mamafa.
Peitai o le Aso Sa lava na sosoo ai, o anapo lea, na toe agiagia ai foi le tagavai a lou atunuu Samoa i New Delhi, ina ua sii ma manumalo i le pine auro, le tamaitai ua lē toe fou ia te ia le ‘ula i le pine auro, le tamaitai o Ele Opeloge, i le vaega o le +75kg super-heavyweight weightlifting.
Ua faatu nei e Ele se isi matatia i nei taaloga a le Taupulega i le 125kg i le snatch ma lana taimi sii sili ona lelei (Games best) e 160kg i le clean and jerk ma manumalo ai loa i le aofaiga e 285kg. Na ta‘ua e Ele, le aogā o le iai faatasi ma isi o lona aiga i nei taaloga, ua telē se faamalosi mo ia, aemaise foi le ‘aumalaga atoa a Samoa.
E tusi lenei lipoti, o loo faatalitalia taaloga a isi foi alo o Samoa, lea e iai lava le talitonuga, e toe sosolo ai foi i luga le fu‘a a Samoa i se taimi lava o le po anapo mo nisi ana auro.
E momoli le faafetai i le faaea atunuu ma le taalo faatausala o nei alo o Samoa o loo ta‘u atu ai le igoa pele o Samoa i faalagamaea o loo fai nei a taaloga o le Taupulega, ae o loo totoe ai aso e 4 o taaloga.
Ma e faamanatu atu lau tapuaiga Samoa ma lau tatalo a o alo faiva au tamafanau, e viia ai le Atua.
O le Aso Lua nei lea e faia ai loa taaloga Lakapi Taitoafitu, lea e maualuga le faamoemoe mo le Manu Samoa…..Malo Tau Malo Toa, Tama Samoa.
