A tatou atiae, ua aumai e le Atua le avanoa e atiae ai, aua le fefe, aua le palaai, aua le faalogo i tala mai tua, ia taalo malosi ma loto atiae. O le sunoaga lea a le taitai o le sauniga ia Rev Elder Lucky Slade na toe fafaga ma tapue ai le faavae mautu o le Iuni Lakapi a Aukilani Samoa i Niu Sila, i le faamanatuina o lona 20 tausaga i le afiafi o le Aso Faraile ua mavae i le faletalimalo o le Holiday Inn i Magele.
O lea po fiafia na auai le Palemia o Samoa le susuga ia Tuilaepa Lupesoliai Sailele Malielegaoi, o ia foi o le taitaifono o le iuni lakapi a Samoa, le Pulenuu o Aukilani ia Tauaaletoa Len Brown, o le Konesula o Samoa ia Faolotoi Fatialofa Reupena Pogi, amepasa o Samoa i Europa ia Fatumanava Pa‘olelei Luteru ma lona faletua ia Pepe Luteru, susuga i faafeagaiga ma o latou faletua, o le taitaifono o le Iuni lakapi a Aukilani ia Mr Mike Donovan, uo ma ē masani a le Kalapu Lakapi a le Aukilani Samoa.
Na tatala le polokalame i le lagiina o vii o le saolotoga o atunuu e lua e le tamaitai ia Marina Davis, ona saunoa lea o le fofoga o le po le afioga ia Vui Kelemete Vitale i le faagasoloina o le polokalame.
O le taulaga faafetai ma le viiga o le Atua faapea le upu faauuina a le Atua na tulai ai le susuga i le faafeagaiga ia Rev Elder Lucky Slade mai le EFKS i Te Atatu. O le afioga ia Toalepai Lui Tautolo o le faatamā a le Iuni lakapi na saunoa aloaia e faafeiloai i le mamalu o le auvalaaulia ma Samoa potopoto.
O le tumutumu ma le lolofi atu o le atunuu i lea faatasiga ua militino faatasi ai ma tagata papae ma molimauina ai le sini ma le faamoemoe autu a le Aukilani Samoa, ae lē gata i lea o faafiafiaga a le faili a le Tepatasi Band na maualuga ai le faamoemoe. O pese faamomoi loto ma faasolo mafaufauga na leai ai se vevesi o le laina a o faagasolo le kiu i le taumafataga.
O saunoaga autu o le afiafi na saunoa i ai le pulenuu o Aukilani ia Tauaaletoa Len Brown, o le taitaifono o le iuni lakapi a Aukilani ia Mr Mike Donovan, o le peresetene o le iuni lakapi ia Aiolupotea John Roache faapea le Palemia o Samoa le susuga ia Tuilaepa Lupesoliai Sailele Malielegaoi.
O le saunoaga na tulimatai i ai lea afiafi, o le lauga a le taitaifono a le Iuni Lakapi a Samoa, ma sa ia lu‘i ai le komiti ma le Iuni Lakapi a Aukilani Samoa, “Ia matuā tuu atoa i ai lo outou fai mea mafai, ia fai i ai le faaiteitemea i mea fou ma mea aulelei, ae aua ne‘i tuutuu i mea tuai auā e solo ai i tua le soifua, auā o le faiga tonu lena o loo taumafai ai foi le malo e tulimatai o le faamaite i mea lelei.”
Na ta‘ua foi i lea saunoaga le gau aano o le malo i le taligamalo i le taaloga ma le Olopeleki lea na o le miliona iva selau afe le tupe na maua mai ai, mai le tolu miliona faselau sa faaaluina.
Ae o le fatu ma naunautaiga o le Palemia e lē vaai i le tele o tupe alu ma le gau aano ae silasila le malo i le ata lapoa sa valivaliina, lea sa matuā ta‘uleleia ai le atunuu i le laufofoga o tagata ma laufanua mamā o Samoa, ua silasila ai le lalolagi atoa aemaise lava i tamafanau o loo aumau i atunuu i fafo.
O le ata foi lea o loo taumafai ai i alo ma tamafanau o le atunuu o loo taaalo, e lē na o le ofu uliuli e iloa ai oe, ae vaai ma le ofu lanu moana e vave ai ona e tu matilatila i le malae ma tele ai foi ma le laulu pologi e fikaina le Manu. O se faamoemoe maualuga sa iai lea faatasiga i saunoaga autu o le po.
Ae na saunoa le failautusi a le Iuni Lakapi le afioga ia Vui Kelemete Vitale, na muamua lava fai taaloga poo soo a Aukilani ma Ueligitone i le tausaga e 1991, ae faatoa tatala aloaia ai lea o le Iuni Lakapi a Aukilani i le tausaga e 1995, ma e valu ‘au na amataina lea faamoemoe.
O le susuga ia Faumui John Mika na amata taitaiina lea faalapotopotoga i le tolu tausaga, ona sosoo ai lea ma le afioga ia Aiolupotea John Roache, sa faapea foi ona tulai mai le afioga ia Papaliitele Peter Fatialofa i le nofoa peresetene i le tasi tausaga, ma toe foi mai ai le afioga ia Aiolupotea John Roache seia oo mai i le taimi nei o loo seei mai pea i le nofoa peresetene.
Ae o le faamoemoe maualuga na faavae ai lenei iuni o le maua o se avanoa e faaaogā mo tamaiti Samoa, auā o le mea sa iai a misi mai i le pikiina o le aufili a Aukilani ua leai foi se mea e faaaogā ai le taleni a fanau, ae o le naunautaiga lea, a misi mai le au Aukilani ae o lea e iai le kalapu lenei e toe taaalo ma faaaogā ai le taleni.
Ma ua iai sui o le Aukilani Samoa ua filifilia i le Olopeleki e pei o le alii o Charles Faumuina ma Steven Luatua, faapea foi ma le Manu Samoa, o le alii o Terry Fanolua ma Taale ma isi tamafanau. Ma o se tasi o vaaiga lelei o lenei Iuni o le maua o le avanoa e tulei ai pea le olaga taalo o tamafanau ina ia aua ne‘i vave faamamulu.
O se tasi vaega o loo toe silasila i ai le komiti o le toe faaauauina lea o le Niu Sila Samoa faatasi ai ma le Samoa All Blacks e pei o le Maori All Blacks, o se moemitiga o loo taoto nei auā o lea ua uma ona feiloai ma le Palemia o Niu Sila.
Aemaise ai o le tasi lea galuega ua tele ina manuia ai aiga ma nuu, auā o le isi tamaitiiti e lē lelei i le aoga ae lelei i taaloga ma manuia ai lona olaga.
