E lei leva tele atu ni masina na faia ai se feiloaiga a Ulu aoga o le Kolisi o Sagato Iosefo ma le Kolisi o Avele faapea taitai o nei kolisi e lua, e mafua ina ua vevesi i le taulaga nisi o tama aoga o nei kolisi.
E lē na o ia kolisi ua aafia nisi o fanau tama o loo aooga ai i ni faaletonu faapea. O le Kolisi o Avele ma le Aoga o Matata Eseese a le Ekalesia Katoliko i Alafua o le Don Bosco ua toe aliali mai ai tulaga faapea ma e to‘a 16 tama o nei aoga e lua ua molia e leoleo.
Fai mai le sooupu o le Matagaluega o Leoleo le susuga Su‘a Muliaga Tiumalu, o nisi o tama aoga na taofia atu e leoleo i le vevesi lea na tupu i le filī maketi e toasefulu tama o le Don Bosco ae toaono Avele.
“O nisi tamaiti na loka mai e ‘onanā ae namu pia isi”. Faaalia e Su‘a o le suesuega a leoleo i le mataupu o loo sailia ai faleoloa na faatau atu i fanau aoga le ‘avamalosi. “Fesili atu i le aualii lea na aumai i le ofisa ae fai mai o fagumalosi ma fagupia ae mumusu e ta‘u i leoleo pe ni ‘avamalosi na faatau pe ni mea na o mai ma latou mai o latou aiga”.
O le Aso Faraile mulimuli o Iulai 2015 na tupu ai le vevesi ma e lē o iloa tonu le mafuaaga. Na loka uma i le vaaiga a leoleo le toasefuluono na pueina mai i le nofoaga na tumutumu ai nisi o fanau aoga o nei aoga e lua.
E tolu po ma le lua aso o taofia ae na faatoa tatala i tua i le Aso Gafua na tea nei. O le faamatalaga a le Sooupu o leoleo, ua lē o toe iai se avanoa mo ni vevesi faapenei e na o le aumai lava loka ma fai moliaga. O aiaiga foi a kolisi ma aoga a maua soo se isi e aafia i ni vevesi e lē toe iai se avanoa e aoga ai ae o le a tuli ma sue se isi aoga e faaauau ai le taumafai.
E pei ona silafia e le aufaitau, o ni vevesi foi a nisi o tama aoga o ni kolisi lava i le li‘o o le taulaga i ni tausaga e lei mamao tele atu, na faia ai se sauniga faapitoa e le taitai o le ekalesia Katoliko na auai le Ao o le Malo ma taitai o le atunuu ona o le sailiga o se fofo i nei vevesi. Peitai ua tuanai ia taumafaiga ae o loo aliali mai pea.
O le aso 18 o Aukuso 2015 o le a valaau ai i le faamasinoga faaitumalo moliaga o tama aoga e toasefuluono. O loo molia i solitulafono o le faamisa i nofoaga faitele ma le umia o ni aupega matautia. O ia aupega o ni maa sa faaaogā i le taimi o le vevesi.
