Talu ona faalauiloa le mataupu ua tagi ai se tina i Samoa nei i le sola atu o lona toalua ma le la fanau e toatolu i Niu Sila, o lea ua ta‘ua e Leoleo i Apia ua agai le suesuega i Niu Sila, ma ua o latou iloa le nofoaga ua iai le fanau e toatolu ma le latou tamā.
Ona pau lea o le faamatalaga na mafai ona aumai i tusitala i Samoa nei i le mulimulitai ai o lenei mataupu e pei ona tuua‘ia ai le tamā o le aiga i le ave faamalosi o le fanau i Niu Sila.
O le faamatalaga a le ofisa o Niu Sila i se tusi na ave i ai e le tina, o lea ua iai suiga fou na mafai ai ona ave le faatagaga i le matua lea na talosaga mo le avatu o lana fanau i Niu Sila ae e lei mafai ona aumai lea faamatalaga i Tusitala.
Faaalia e Su‘a Tiumalu, e lua moliaga lea ua vaavaai i ai leoleo e aafia ai le tamā o le aiga, o le Kidnapping ma le Abduction – o moliaga ua taulai uma i le ave faamalosi o le fanau e aunoa ma le iloa ma le ioega foi a le tina o le aiga.
O lea foi ua faatautaia suesuega a le Ofisa o le Palemia ma le Kapeneta, lea e iai le ofisa o femalagaaiga a Samoa i lana vaavaaiga i lenei mataupu ina ua laga e ofisa faasalalau i Samoa nei.
O le Toomaga mo ē Puapuagatia lea ua fesootai atu ma leoleo ina ia taumafai e aumai le fanau i Samoa nei, ae o le faamatalaga a leoleo o loo taumafai lava ina ia mafai ona aumai faatasi le tamā ma le fanau i Samoa.
O le vaiaso na tea nei na agai mai ai le aiga o le tamā ia Apolimatai ma le faamatalaga i le mafuaaga ua faia ai e le tamā lenei tulaga ona o feeseeseaiga ma le tina o le aiga, ma na iai le manaoga e faalauiloa lea mafuaaga ma le mafatiaga o le tamā ia Apolima i le tulai mai ai o le feeseeseaiga e pei foi ona vaaia i luga o le facebook ua faasolo ai tuua‘iga nei faasaga i le tina o le aiga.
O le faamatalaga a le ofisa o leoleo, ma ofisa faasalalau na tau mai i ai le sāvali, o feeseeseaiga i le va faaleulugalii o se mataupu lena i le va o le tamā ma le tina o le aiga, ae o lipoti ua taulai sa‘o lava i le tulafono ua soli, ma o le mafuaaga lea o le faalauiloa o le mataupu ona o le ave faamalosi muamua lava lea o ni fanau ua lipotia i Samoa nei ma ua oo atu i Niu Sila.
O le puipuiga o le fanau e tāua i le vaavaai a le Toomaga mo ē Puapuagatia ma o le mafuaaga lea na malilie ai le aiga o le tamā o le aiga ina ia toe tolopo ni faamatalaga e toe alu i luga o le ea.
O lea la e tālia le isi laasaga o le suesuega a le Ofisa o Leoleo i le vaiaso lenei e faatatau i lea mataupu.
