O talasua ina ua mae‘a ona valaau talosaga poo tagi ua faaulu e nisi sui tauva ma matai o se afioaga faasaga i le tulaga agavaa o nisi o sui tauva o le palota tele, na faalogoina ai motugaafa a nisi sui sa auai e faapea o lea ua faatulaga mai aso ma taimi e fofogaina ai talosaga, ae ua amata i le taaloga autu poo le main event ae sa tatau ona taualuga i ai.
E faasino manatu talasua o ia tagata i le faamasinoga i le va o le Palemia o le faigamalo lē tumau le sui faipule o Lepa, ma le sui tauva o le Tautua Samoa le tofa Tuula Kiliri Lafi Tuitui, lea ua fesiligia ai le tulaga agavaa o lea sui tauva ona e faapea e lē o faamalieina aiaiga o le tulafono o faigapalota i le faia o le monotaga.
O aiaiga foi ia o le tulafono o palota ua toe teuteu ma ua aiaia ai e tatau ona faia ma faatino le monotaga i totonu o le tolu tausaga.
Sa fesiligia Tuula i sona lagona e tusa ai o le la faamasinoga auā o le faalua lea ona faaulu lona suafa e tauva mai le itumalo o Lepa, ae o lea foi ua fetaiai ma se tagi ua fesiligia ai pea lona tulaga agavaa i le faia o lana monotaga.
“Sa ou tatalo lava i le nuu ma faailoa i ai lo‘u fia alu i le palota ma ua aumai le latou lagolago, o le upu foi i la‘u monotaga o le a tou silafia lava la‘u tali o le a tuuina atu i luma o le faamasinoga”.
E lei finagalo Tuula e faailoa mai i se tulaga faalauaitele sona finagalo i le tulaga i le monotaga ona ua vave ona fia faamavae tusitala ae tuua le maota o Tupulaga o le EFKS i Mulinuu sa faia ai le faalauiloa o le Anavatau ma sui tauva o le Tautua Samoa, ona o nisi o ona tuatuagia. “Malilie le tatou vasega o tusitala se‘i o‘u alu e saili la‘u loia e tapena ai a‘u mo le tulaga lea”.
E iva mataupu sa faaulu i le faamasinoga e faatatau i tulaga agavaa o sui tauva. Peitai o le toe valaauina o nei mataupu i le Faamasinoga Maualuga i le Aso Faraile ua mavae, na iloa ai ua toe faaui i tua le talosaga a se tasi o sui tauva tamaitai mai le itumalo o Gagaemauga Numera 2 faasaga i le isi sui tauva tamaitai o lea lava itumalo.
O le afioga Seuoti Sheryl Fialuma Laauli Siliniu Muagututia na tagi i le tulaga agavaa o Semau Faamau Levi i le aiaiga o le tolu tausaga e nofomau ai i Samoa. Ua toe faaui i tua le talosaga a Seuoti Sheryl ma ua faaauau ai ona tauva nei sui tamaitai e toalua mo le nofoa o le Gagaemauga Numera 2 i le Palemene.
Na faailoa foi i taualumaga nei a le faamasinoga le faaui i tua o se tasi o sui tauva o le itumalo o Aleipata Itupa i Luga o Taula Faulaau Taula Sini ina ua tapunia le avanoa e toe faaui ai i tua ni suafa o sui tauva.
O le mafuaaga lea ua lē faaauauina ai le tagi na faaulu e Amituanai Fagaivalu Kenrick Samu sa umia le tofi faipule o lea itumalo faasaga i lea sui faaulu o le palota. Ona totoe ai lea o talosaga e fitu o le a faaauau i ai suesuega a le faamasinoga lea na amatalia i le Aso Gafua o lenei vaiaso fou.
O le faamoemoe o le a aumai ni faaiuga o nei mataupu a o lei faia le palota ma le faiga filifiliga a le atunuu i le Aso Faraile o le vaiaso fou le aso 4 o Mati 2016.
