Lou aiga, lau fanau aoga, lou saogalemu, lou lumanai ia opogi

O le uluai fonotaga mo tagata Atumotu o le Pasefika, o le faamalosia o aganuu, o puna oa eseese, o atugaluga ma aafiaga o le soifua lautele aemaise le mamanuina o le faamoemoe mo se lumanai manuia o tagata Pasefika ao aumau ai i Aotearoa, nisi ia o mataupu anoa sa soalaupuleina i le uluai fonotaga lea sa faamaopoopoina e le Matagaluega o le Pacific Island Affairs (MPIA) ma le Career Services lea o loo galulue ai nisi o alo tamaitai Samoa o Melissa Stanley ma Fuakoko Tanielu.
O lenei fonotaga sa usuia i le aso Lulu na te’a nei, i le Ofisa o Lafoga i Kalaiesetete, na amataina i le tatalo faafetai e le susuga i le faafeagaiga Rev Moega Lasei o le Samoan Congregational Church i Linwood.
Na faatumulia le potu fono i tagata atumotu ma o le maitau o le 75% o ia tagata o Samoa ma sa taulamua ai foi.
O le fonotaga foi lenei e galulue soosoo tauau ai matagaluega uma o le malo ma isi ofisa, o loo galulue ai alo ma fanau Pasefika e soalaupule ai mataupu eseese mo le lumanai aoga o tagata Pasefika.
E toatele tamalii ma alo o le atunuu o loo galulue i nei ofisa eseese ma ua tufa mai foi o latou agavaa e fesoasoani ma opogi faatasi le faamoemoe.
O nisi nei o mataupu sa taunapa iai ma faatalanoa, o fesoasoani ma auaunaga eseese a matagaluega nei:
O le Victim Support, le toomaga mo e puapuagatia mai faalavelave faafuasei Le fesoasoani a le Problem Gambling mo e aafia i faafitauli o le taalo masini tupe Aoaoina o le autalavou e le faalapotopotoga a le Youth Training PEETO Careers Service fesoasoani mo sailiina o galuega – Fuakoko Tanielu Mataupu tau tulafono Law NEED Ofisa o Aoga, le MOE – Fuetanoa Seinafo Canterbury University – Maria Lemalie, Liz Keneti & Memea Maaelopa)
Sa faamamafaina i lenei tauaofaiga le mataupu tau aoga lea ua faaigoaina o le SPAC PAC (Specifically Pacific), e faamalosia ai le tausolomua i tamaiti aoga i le tulagalua ma kolisi maualuga le ola aoaoina ma ia tulai mai oni taitai Pasefika manuia o le lumanai
Na uluai faatuina lenei faalapotopotoga e le asosi tuufaatasi a faiaoga a Kalaiesetete. O le atoaga o le sefulu tausaga o le faalapotopotoga o le a faamanatuina lea i le masina fou i le 21-24 o Mati.
O loo fuafua le komiti faafoe e tatala aloaia lea faamoemoe i se sauniga lotu i le St Paul’s Trinity Pacific, aofia ai aoga uma mai le motu Saute. E fa aso o lea faamoemoe, aofia ai i le polokalame tauvaga lauga ma faafiafiaga faale aganuu.
Na saunoa le alii faufautua sinia o le asosi fanau Samoa aotauina i le Iunivesite Canterbury, susuga Memea Eleitino Maaelopa, o le a tapena foi alo o le Iunivesite e opogi le faamoemoe o kolisi maualuga ma faalauiloa ai tamaiti sikolasipi fou ua malaga mai Samoa.
O le usuia o le fonotaga, o le molimau atu ina ia iai le ola saoloto i o tatou tagata aemaise a tatou gaioiga ia tusa ma le finagalo o le Atua, ma avea ma fatu o le faamoemoe mo taeao