“La‘u Pele ea, o oe lava o la‘u Valentine”
A oo ina matua le olaga, e faasolo manatu i tala ma mafutaga o le taimi tuanai, e toomaga i ai le mafaufau pe a tauau ina eeva e tau fatufatu se manatu mo le lumanai.
O le faamanatuina o le aso Valentine, lea e faatinoina i le feofoofoai o alofa e ala i teu fugalaau, tautinoga tusitusia faapea sukalati suamalie e manatua ai le faatauaina o soo se mea lelei ua faia e se tasi mo le isi tagata aemaise o mafutaga faaleuo ma ulugalii i totonu o aiga.
O se tausinioga o solo upu poo nai faasoa pupuu sa faaleoina e le mamalu o le atunuu na maua avanoa, i luga o le auaunaga a le ualesi faasalalau Penina o Samoa 96.9 Plains FM i Kalaiesetete, lea la ua manumalo ai le afioga Faalavaau Livi Tafua (Falelatai) ma lana manamea o Mele Tafua (Manunu).
O Faalavaau e galue o ia i le faafoeina o taavale laiti laupasese mo femagalaiga i luga o auala, ae o lana manamea e galue faafaiaoga lagolago mo courses i Hagley Learning Institute.
Ua faamanuiaina i laua mo se taumafataga i le faleaiga (dinner under the stars) o le Grand Restaurant i le Casino, teu fugalaau matala faatasi ai ma sukalati ma se tusi o loo lomia faapitoa ai tusitusiga o le aso Valentine, faatasi ai ma le lomia o le la ata ma le solo i luga o le tautua a le nusipepa Samoa Times.
O upu la nei o le solo e pei ona tusia e le faletua o Mele Tafua:
“Si au uo e, si ou lalelei e, o si ou manamea lava oe.
Tulai mai ia ua gafoa le ata, aua ua mavae atu lena tausaga.
Ao oe ma au ia ta saunia mo le siitiaga. Ua i lo‘u fatu lou lima tauagavale, ma lau musumusu mai e te alofa faamaoni ia te au, ma e faapalepale.
Faafetai tele lava ia te oe si ou au, o lou alofa foi mo oe e oo lava i le tuugamau.
O ni o‘u sese faamolemole faamagalo, aua e sa’o lava le tagata i ona manatu. Ae sau ia la‘u Valentine, e faapei ona naunau o le mutia i le sau, e faapena ona ou naunau ia oe lo‘u au”.
Ae o se tuualalo a le tusitala e faapea, ia nonofo faatasi i le fealofani ina ia tatou manavaina le sau mai Mauga, o le mea lelei lea ma le matagofie.
Ia pei o le naunau o le mutia i le sau, ia faapea lo tatou naunau i le Atua, o le Sau o le ola.
