O le Aso Faraile o le vaiaso nei e faia ai faigapalota laiti a itumalo faafaipule o Safata ma Faleata i Sisifo.
O Vaisigano Numera 1 ua leai se palota laititi auā ua toe fulisia lea itumalo e faaauau pea e le afioga i le aloalii, Vaai Papu Vaelupe Vaai, le tofi faipule seia mae‘a le paeaiga o iai nei a le Palemene.
Ua momoli ai le faamalo a Lealailepule ma Palusalue i le afioga i le aloalii ma le finagalo lagolagoina o ia e lona itumalo. Peitai o loo taufao le mai ma le magalo o ia sui faatutu o le Tautua Samoa pe toe filifilia pe leai.
“I lo‘u lava itumalo ou te ta‘u atu ia te outou e mamao, mamao lava lo‘u manumalo. O lo‘u matai foi o se suafa laititi, o le matai faifeau e mu mata i le umukuka, ma o le ituaiga faipule lena e manao i ai lo‘u itumalo, o le tagata e galue”, o le finagalo lea o Lealailepule Rimoni ina ua tuusa‘o i ai se fesili a le tusitala i se tulaga o loo la silafia ma Palusalue e oo i ai le palota laititi auā ua valoia e nisi o sui o le HRPP lo la lē toe umia o tofi faipule.
“O a‘u lava ia ou te mafanafana i le lagolago a lo‘u itumalo, ae afai e manumalo mai se sui a le HRPP o ina e ta‘u mai ai ia te au, e le suia le Malo i le palota tele o le tausaga fou.
O le naunautaiga lena o a‘u ia sui le faigamalo ae afai ou te lē toe sau, o lona uiga e tumau lava le HRPP”, o le finagalo lea o Palusalue Faapo II.
O le feiloaiga a tusitala ma ia sui tauva o le Tautua Samoa Party, na folasia ai e Palusalue sona faanoanoaga i le faia e nisi o nuu ma afioaga o lona itumalo ni tapu ua faasā ai ona palota nisi ia te ia, ae ia palota uma i sui faatutu o le HRPP.
Ua faaalia foi e Palusalue le aafia ai ma taaloga lakapi a le iuni a lona itumalo i le palota.
Na faailoa e lea tamalii ua lē toe auai nisi o au lakapi i le taamilosaga a Safata ona o tapu a nisi o afioaga o lona itumalo, peitai o loo musu Palusalue e faailoa poo ai nuu ia.
O loo talitonu lea sui tauva o le HRPP o se vaega faaupufai e faatāua ai aiā tatau o tagata e filifili saoloto poo ai le sui e lagolago i ai, peitai o tapu ua faia e aliali mai ai e le o savali le HRPP i lana mau tauave o se pati e puipuia aiā tatau o tagata.
O se faafitauli foi faapea ua aafia ai ni afioaga o le itumalo faafaipule o Faleata i Sisifo e pei ona faia le Tapu a Toamua e sā ona palota ese se tagata, ae ia palota uma i le tofa Ale Vena.
Ua lagolago foi i ai le fuaiala o Sa‘iga poo Saina o loo silafia ai lea nuu o le itumalo o Faleata i Sisifo.
